Accessibility links

пәнҗешәмбе, 8 декабрь 2016, Казан вакыты 13:03

Tatar bazarı: Fatir remontlaw


Räfis Cämdixan. Minem yortım- minem kirmänem dilär inglizlär. Soñğı yıllarda, bu süz Rusiä xalqı arasında da nıq populyarlaşıp kitte. Qazan öçen bu bigräk tä möhim problema. Çönki tözeleş qotoçqıç tizlek belän bara. Yaña yortlar, toraqlar tözelgän sayın, alarda remont eşläre başlana.

Ä Qazanda fatir remontlawçı distälägän firmalar da, materiallar täqdim itüçe kibetlär dä distälägän. Soñğı waqıttağı remont mäşäqätlären üz cilkäsendä tatığan daimi avtorıbız, Aygöl Nurlı zamança remont häm moda xaqında söyli. Räxim it Aygöl.

Aygöl Nurlı.Yaña fatirlar tözelgän sayın, remont eşläre dä kiñäyä bara. Çönki, fatir aluçılar xäzer anıñ idän tüşämnären, diwarların, işek-täräzälären üzläre telägänçä qoralar, bizilär. İske fatirlarnı da, yañalarında üzgärtep qoru, diwarların küçerep, keçkenä bülmälärne zuraytıp, zurların bülep, zamança dizayn modasına iärü ğädätkä kerep bara. Bu bik küp mäşäqätlär häm çığımnar sorasa da, ber dä qıyınsınmıyça remontqa, zur därt belän kereşälär. Çönki bu yañalıq, yaña standartlar häm yuğarı sıyfat üzenä tarta, mawıqtıra. Xäzerge Qazan fatirı sovet zamanındağı toraqlardan cir belän kük kebek ayırıla başladı. Elek tabarğa mömkin bulğan, defitsit oçsızlı oboy häm rezina linoniumnar, qul astında bulğan faner taqta häm tözsez plitkalar belän öyeñä bizäw zur bäxet sanaldı. Häm bu äle spekulyantlar, yuğarı citäkçelär, törle blatnoy keşelärgä genä täti ide. Ä bügen isä mömkin qädär maturraq, zatlıraq häm zäwıqlıraq itep, üzeñ telägänçä yortnı buldıru, bizäw ixtıacı tudı. Xätta mömkinlege bulmağannar da, yuğarı standartlarğa omtıla. Ä bulğannarı inde tämam şaştı diärgä bula. Xäzer fatir remontlaw, bizäw firmaları ğına da Qazanda illedän artıp kitte. Evroremont däräcäsendä eşläwçe keçkenä şabaş brigadaları isäpsez-sansız. Teläsäñ, fatirıñnı yañadan tudırıp, yaña işek açqıçın qulıña tottıralar, aqçasın ğına tülä. Teläsäñ, täräz töbeñne alıştırıp, yä buyap qına da birälär.

Remont brigada tabu awır tügel anısı. Ä bulaçaq fatirıñnıñ proyektın, qiäfäten nindi materiallardan buluın bilgeläw, yort xucasınıñ zäwığına turı kilergä tieş. Dimäk ul üze dä tözüçegä äylänä. İnternettağı Qazan portalında dürt meñnän artıq tözeleş materialları isemlegen kürergä bula. Alarnı distälägän erele-waqlı kibetlärdä satıp alırğa. İñ zur häm iñ kiräkle äyberlärne sata torğan kibetlär çeltäre isemnäre här kemgä bilgele. AĞAWA, EVROİNTER'YER, ZAMAN, DEvON kebek süzlär irlärneñ häm xatın-qızlarnıñ aralaşuında mäxäbbät süzlärennän dä yışraq yış yañğırıy torğan süzlär. Mömkin qädär qimmät cihazlar, material qullanuçılar bulsa da küp tügelder. Alarnıñ dizayner häm yärdämçeläre üz eşlären belä. Ä inde urta xällelär, yäki urtadan çaq qına xälleräklär menä şul kibetlärdäge mallarnı atnalar, xätta aylar buyı öyränep yörilär.

Räfis Cämdixan. Räxmät Aygöl. Menä äle sin kibetlär, tözeleş brigadaları turında söylägändä, ğäcäpkä qaldım. Biznesnıñ bu töre şul qädär alğa kitkän ikän, xätta , fatirlarnı bizäw, yäğni dizaynlaw buyınça akademiä bar ikän Qazanda. Älbättä, monı fännär akademiäse belän çağıştırıp bulmıy inde. Şulay da, bu fakt, remont dip atalğan närsäneñ şaqtıy keremle eş ikänen kürsätä. Yarar, monısı ber xäl. Ä remont cihazların kibetläreneñ küplegen äyt äle sin. Keşe alarnı gizep kenä dä küpme waqıtın ütkäräder ul?!

Aygöl Nurlı. Bıyıl közdän başlap miña da şul yullar belän ekskursiägä yörergä, oboy, plitka, buyaw, şpaklevka saylap öygä qaytarırğa turı kilde. Distälägän kibetlärdä bik küp çaqrımnar ütärgä turı kilde. Şaqtıy ğına waqıt häm aqça taläp itsä dä, mawıqtıra torğan şöğel ikän. Çönki, mäsälän, yaxşı ğına vanna alam disäñ, alar şul qädär küp törle, qaysın saylap alırğa belmässeñ. Ciñü prospektındağı Devon kibetendä su belän massaj yasıy torğan Al'batros isemle vanna tuqsan ber meñ sum tora. Wişnevski uramındağı ZAMAN kibetendä, ışanasızmı, yuqmı, ike yöz tuqsan meñ sumlıq duş kerü kabinası bar. Alar bar ikän, dimäk, satıp aluçısı tabıla. Aqçañ citmäsä, öç meñlegen dä alırğa mömkin. Min üzem unike meñ sumlıq poçmaqqa quyıla torğan zur vanna aldım. Üzenä kürä zatlı ğına äyber alğaç, anıñ başqa cihazları da, közgese, krannarı da yaxşıraq bulsın dip tırışasıñ. Aqça şul krannan su kebek şabırdap qına ağa. Älbättä ul bik tiz betä. Anıñ qarawı, yaxşı äyberne qaytarıp urınğa quyğaç, dönya bötenläy başqaça kürenä başlıy. Zinnätleräk tormışta yäşise kilä bit, qähäreñ. Şul waqıtta küpme burıçqa alğanıñ da onıtılıp tora.

Menä şul aqça citenkerämäw arqasında da sıyfatlı häm oçsızraq tovar alu bik aktual' bulıp kitä. Berük östälne fälän kibettä öç meñgä, ikençesendä biş-altı meñgä täqdim itälär. Sin üzeñä kirägen saylap alasıñ. Bik näzäqätle, ital'yança eşlängän rakovina alasıñ kilsä, ZAMAN kibetenä barasıñ. Şulay uq, sıyfatlı, ämma beraz ğadiräge kiräk bulsa, EVROİNTER'YER kibetendä ike tapqır oçsızrağın tabasıñ.

Min sezgä säğätlär buyı gipsokarton, buyala häm buyalmıy torğan, ämma bik matur räsemle häm küpertep yasalğan bizäkle oboylar turında söyli alır idem. Täcribä şunı kürsätä, iñ çetereklese, aqça citkerü. Ägär dä, fälän summağa, remont yasıym disäñ, törle kibetlärdä yöri torğaç häm remont ostaları belän söyläşä torğaç, barıber şul summağa sıyışıp bula. Kibetlär üzlärenä satıp aluçını cälep itär öçen buşqa xezmät kürsätü, öygä kiterep quyu, bäyägä taşlamalar birü belän qızıqsındıralar. Ä STARİK XOTTABIÇ kibetendä satıp alınğan här tovarğa yaña yıl aldınnan ber şeşä şampan şäräbe, başqa waqıtta berär başqa prezent birälär. Menä şunda inde üzeñne çit ilgä barıp çıqtım dip uylıy başlıysıñ. Kibetlär üzara yarışa ikän, qaywaqıtta bäyälären töşerä ikän, bu inde bezneñ faydağa. Alar deskont qartaları belän üzlärenä satıp aluçılarnı bäyläp quyalar. Şul uq kibetkä tağın kilsäñ, öç-biş, xätta un protsentqa oçsızraq bula.

Älbättä bügen söylägännär eşneñ başı ğına. Remont ul şaqtıy ozaqqa suzıla. Üzeñ dä beraz ğına tözüçe häm dizaynerğa äylänep kitäseñ. Busı da tormışta kiräk bula. Ä uñaylı häm caylı tormış şartların tudıru mömkinlege yıl sayın tügel, ä ğömergä ber yä ike tapqır ğına nasıyp bula.

Räfis Cämdixan. Räxmät Aygöl. Bu tatar bazarı tapşıruı buldı. Anı Azatlıq öçen Räfis Cämdixan häm Aygöl Nurlı äzerläde.

XS
SM
MD
LG