Accessibility links

Omskinıñ “İrtış” ölkä däwlät teleradio şirkätendä eşläwçe “Säläm” tapşıruına 15 yıl buldı


Şundıy süzlär belän Omskida tatar telendä radiotapşıru başlanıp kitä. Mäglüm bulğança, “İrtış” ölkä däwlät teleradio şirkätendä tatar tapşıruı 1989 yılnıñ iyülendä “İrtänge äñgämädäş” programmasında berençe märtäbä efirğa çıqqan ide. 1990 yılnıñ fevralendä ul “Säläm” iseme astında ayırım programma bulıp eşläp kitte. Bıyıl “Säläm” redaksiäneñ eşçänlegenä 15 yıl tuldı. Bu waqiğa uzğan şimbä-yakşämbe könnärendä tantanalı räweştä bilgelände. Şimbä könne Omskinıñ “Qızıl Gvardiä” mädäniät sarayında küp xalıq qatnaşlığında tantanalı kiçä uzdı. Foyeda redaksiäneñ eşçänlegen kürsätkän fotoräsemnär kürgäzmäse eşläde. “Säläm” programmasınıñ yubiley kiçäseneñ töp oyıştıruçıları, älbättä, programmanıñ avtorları, ä berençe yärdämçeläre “Umırzaya” kollektivı häm tatar milli mädäni möxtäriäte wäkilläre buldılar.

Bäyräm çaralarında Tatarstannan, Tömännän, Novosibirskidan, Qazaqstannıñ Semey şähärennän kilgän mädäniät xezmätkärläre häm ölkäneñ awıl-rayonnarında eşläwçe icat kollektivları qatnaştı.

Yubiley barışında räsmi dairälärdän täbrikläwlär küp buldı. Tapşıru avtorlarına Rusiä Däwlät Dumasınıñ mäğärif häm fän komitetınıñ, ölkä mädäniät ministrlığınıñ, şähär xakimiäteneñ milli häm dini eşlär idäräseneñ, “İrtış” ölkä däwlät teleradio şirkäteneñ, “Seber” töbäqära milli-mädäni sport berläşmäseneñ, “Watanım Seber” xäyriä fondınıñ räxmät xatları häm büläkläre tapşırıldı. Tomski Novokuznetski, Barnawl şähärläreneñ tatar üzäklärennän kilgän täbrikläw telegrammaları uqıldı. Rusiä Däwlät Duması deputatı Oleg Smolinnıñ telefon aşa täbrikläwe zalda utıruçılarğa da citkerelde.

Tatarstan mädäniät ministrlığınıñ respublika xalıq icatı üzägeneñ baş belgeçe İlgiz äfände Kadırov “Säläm” redaksiäsen ministrlıq isemennän räsmi täbrikläde, annan soñ üzeneñ programma avtorlarına bağışlap yazğan şiğeren uqıdı.

Novosibirski tatar mädäniät üzäge direktorı Rauza xanım Tixomirova, Semey tatar sänğät mäktäbe direktorı Gabdelxak äfände Axunjanov, Tömän şähäreneñ - “Region-Tyumen” teleradio şirkäte kommentatorı Nail Xisamiev yubiley kiçäsendä yasağan çığışlarında “Säläm” redaksiäse belän tığız bäyläneştä toruları turında söylädelär. Rauza xanım belän Gabdulxak äfände matur cırların da büläk ittelär.

Yubileyğa ölkäneñ awıl-rayonnarında eşläwçe tatar kollektivları da çaqırılğan idelär. Häm äytergä kiräk, rayon xakimiätläre yärdäme belän alarnıñ küpçelege bäyräm çarasında qatnaşa aldı. Tara şähäreneñ “Nur”, Kolosovkanıñ “Mäxäbbät”, Bol'şereç'ye rayonınıñ “Naza” häm “Bolğar” kollektivlarınıñ çığışları kiçäneñ kürkäm bizäge buldılar . Şunı da äytergä kiräk, yıl yarım elek oyışqan Tara rayonınıñ “Nur” kollektivı bu köngäçä milli kiemnär buldıru mäs’äläsen xäl itä almağan ide. “Säläm” tapşıruı yubileena çaqıru alğannan soñ, kollektiv rayon xakimiätenä möräcäğät itkän häm tiz arada yaña säxnä kiemnäre buldıruğa ireşkän. Omski säxnäsendä alar matur milli kiemnärdä buldılar.

Yubiley kiçäse anda qatnaşqan barlıq kollektivlarnıñ häm zalda utırğan xalıqnıñ bergäläp “Tuğan tel” cırın başqaruları belän tämamlandı.

Cirle tatar radiotapşıruı yubilee yäkşämbe könne Bol'şereç'ye rayonınıñ Yılanlı awılında däwam itte. Anda Tatarstan, Qazaqstan, Novosibirski qunaqları häm “Umırzaya” kollektivı “Säläm” yubileena bağışlanğan konsert programmaların kürsättelär. Yılanlı xalqı öçen bu kötelmägän bäyräm buldı. Oçraşudan hämmä keşe qänäğät qaldı. Barsı da xalqıbız moñnarın, tuğan telebez ahäñnären, tatar dönyası yañalıqların töbäkneñ iñ yıraq poçmaqlarına da citkerep toruçı “Säläm” redaksiäsenä räxmätle buluların belderdelär, mondıy çaralarnıñ yışraq ütkärülären soradılar.

Menä şundıy tantanalar belän bilgelände Omski “İrtış” ölkä däwlät teleradio şirkäte qarşında eşläwçe “Säläm” radiotapşıruınıñ 15 yıllığı. Şulay zur külämdä ütkärelgän bu çara ğadi tamaşa ğına bulıp qalmadı. Küplärgä ul tatarlıqların qabat islärenä töşerergä yärdäm itte. härxäldä zalda utıruçılar arasında bitaraflar kürenmäde. İkençedän biredä soñğı waqıtta yabılu qurqınıçı astında torğan milli tapşırularnıñ yazmışı da berniqädär açıqlandı kebek. Yubiley kiçäsendä qatnaşqan “ teleradio şirkäte räise urınbasarı Denis İovlev “RTR citäkçelege belän söyläşülär bara . Milli tapşırularnı bez kiläçäktä dä saqlap qalırğa tırışaçaqbız,”- dip wäğdä birde. Bu süzlär älbättä tatar tapşırunıñ ğömerle bulaçağına ömet uyatmıy qalmadı .

Saniä Mirxaleewa. Azatlıq Radiosı. Omski

XS
SM
MD
LG