Accessibility links

җомга, 9 декабрь 2016, Казан вакыты 08:48

«Tatarstan» TV häm radio kanalı beterelde


Xalıq arasında Tatarstan däwlät tele-radiokompaniäsene beterelä digän süzlär bik küptännän yöri ide. Tatarstan prezidentınıñ Färmanında “Däwlät elektron massaçıl mäğlümat çaraları eşen kamilläşterü häm berdäm mäğlümat mäydanın tä'min itü maqsatında, şulay uq “Bötenrossiä däwlät televidenie häm radiotapşırular kompaniäse” Federal' däwlät unitar şirkäte strukturasındağı üzgäreşlär uñayınnan” digän cömlälär dä bar. Rusiädä barğan üzäkläşterü säyäsäteneñ tağın ber çarası bu dip añlarğa mömkinme monı? Soñğı yıllarda, “Tatarstan” däwlät tele-radio kompaniäsenä bolay da Rusiäneñ ikençe kanalı qısalarında sanawlı waqıtlarda ğına eşläp ala ide bit.

Tatarstan däwlät tele-radiokompaniäse direktorı Ayrat Sibğätullin Azatlıq radiosına bolay dip belderde.

Rusiä prezidentınıñ 2003 yılğı Färmanı häm Rusiä xökümäteneñ 2004 yılğı “Bötenrusiä televidenie häm radiosı” digän qararı nigezendä “Tatarstan” DTRK Rusiä DTRK filialı bularaq üzgärtelä

Ğadi süz belän äytkändä, inde 80 yılğa yaqın eşläp kilgän däwlät tele-radiokompaniäse Rusiä däwlät tele-radilkompaniäseneñ filialına äylänep qaldı. Tatarstanda Azatlıq radiosı da, üz dulqınnarınnan häm Yaña ğasır kanalınnan tış, Tatarstan radiosı aşa da yañğırıy ide. Rusiä televidenieseneñ filialına äylängäç, TV häm radioda programnar üzgäreşe bulaçaqmı soñ digän sorawıbızğa, Ayrat Sibğätullin bolay dip belderde.

Bezneñ tapşırular çeltäre üzgärde bit inde. Bez inde ike yıl “Rossiä” kanalı çeltäre buyınça eşlibez. Üzgäreşlär şundıy, sişämbe, pänceşämbe könnärne berär säğät sänğät programnarı öçen urın birelde. İnformatsion programmalar här kön bulaçaq. Şimbä köngä ike säğät waqıt qaldırdılar, anda zakaz buyınça programmalar bulaçaq, üzebezgä aqça eşlär öçen

Ayrat Sibğätullin, TV üzgäreşlär turında söyläde. Ä radio mä’säläsenä kilgändä, direktor süzlärenä qarağanda, äle küp närsä bilgele tügel, radio da şul isäptän, üzgäreşlär buluı ixtimal.

Tatarstan radiosı, respublikada ğına tügel, Ä Başqortstan, Kirov, Mari El', Çuaşstan, Ulyan, Samar, Tübän Novgorod kebek kürşe töbäklärdä dä yañğırıy. Kiläçäktä, bu ölkälärgä tatar awazın, moñın citkerü buyınça Bötenrossiä däwlät tele-radiokompaniäseneñ Tatarstan filialı kanalınıñ mömkinlekläre üzgäräçäk.

Tatarstan prezidentınıñ Färmanı isä, Respublika Rusiä TV häm radiokompaniäseneñ filialın finanslawnı üz östennän töşergänlegen añlata. Älbättä, bu oçraqta, TV häm radionıñ qayber xezmätkärläre dä qısqartıluı ixtimal.

Älbättä, Tatarstan, çit töbäklärdäge millättäşlärebezne häm respublika xalqın bixäbär qaldırmıy. Mäsälän, ike däwlät telendä dä Yaña ğasır TV häm FM diapazonındağı radiosı eşli. Ä 80 yılğa yaqın tarixı bulğan häm ozın dulqınlı Tatarstan DTRK kiläçäge nindi buluın küzätep barırbız.

Rafis Cämdixan

XS
SM
MD
LG