Accessibility links

якшәмбе, 4 декабрь 2016, Казан вакыты 13:15

Başqortstan tatar oyışmaları respublika xakimiätenä qarşı çaralar ütkärä


Başqortstandağı tatar milli xäräkäte respubliktağı tatar xoquqların yaqlap, çirattağı köräşen başlıy. Kiläse atnada Başqortstan tatar milli oyışmaları berlegenä kerüçe yegermegä yaqın oyışma wäkilläre respublik xaqimiätlärenä qarşı üzläreneñ aqsiälären başlayaçağı xaqında iğlan itte.

Bu xaqta tatar cämägätçelek oyışmalarınıñ 11 fevräl könne ütkän kiñäytelgän utırışında belderelde. Başqortstan Tatar cämägätçelek oyışmaları berlege räise Ramil Bignov üz çığışında qarşılıq çaralarınıñ iñ täwdä närsädän ğıybarät buluın añlattı. Anıñ süzlärençä, kiläse atnada düşämbedän başlap biş kön däwamında tatar milli oyışmaları wäkilläre kön sayın irtänge säğät sigezdän kiçke cidegä qädär Başqortstan prezidentı utırğan Aq yort qarşında piket oyıştıraçaq. Ramil äfände äytüenä qarağanda, Aq yort qarşında kön sayın Başqortstannıñ tatar xalqı xoquqların yaqlap yazılğan şigärlär totqan ille-altmış keşe toraçaq. Könneñ salqınlığın isäpkä alıp, piketta toruçılar kön ozını qaynar çäy häm aş belän täemin iteläçäk. «Ägär kiläse atnada biş kön däwamında da respublik citäkçeläre bezneñ taläplärgä qolaq salmasa, bezne tıñlarğa telämäsä, qarşılıq çaraların artaban da däwam itäçäkbez», – dip belderä Ramil Bignov.

Utırışta äytelüençä, piketqa çığuçılarnıñ taläpläre küp törle. Şular arasında Başqortstanda tatar telenä dä däwlät tele statusın taläp itü, radio häm telewideniedä tatarça tapşırularnı arttıru, tatar mäktäplärendä tatar balaların başqortça uqıtuğa küçerüne tuqtatu häm başqalar häm başqalar. Möräcägätlärneñ qayberläreneñ prezident Mortaza Räximovqa yünäldereläçäge xaqında da äytelde.

Tatar milli xäräkäte liderları älege kisken adımnarğa barunıñ säbäplären dä bäynä-bäynä söyläde. Professor Mäcit Xucin süzlärençä, Başqortstan xaqimiätläre respublqada yäşäwçe tatarlarnıñ milli-mädäni mänfägätlären qänägätländerü cähätennän barmaqqa barmaq ta suqmıy. «Alay ğına da tügel, şul xoquqlarnı yaqlawçı tatar milli oyışmalarına qarşı äledän-äle höcümnär dä oyıştırıp tora, – di Mäcit äfände. – Moña soñğı misal itep, un kön elek bezne üzebez bilägän binadan uramğa quıp çığaru oçrağın äytü genä dä citä». İskä töşerep ütik, un kön elek Ufa üzägendäge binadan tatar oyışmaları urnaşqan häm eşçänlegen alıp barğan bülmälärne xaqimiätlär, aldan kisätmiçä, bikläp quydı häm andağı doqumentlarnı, räsmi qäğäzlärne qulğa aldı. Älegä qädär ul bülmälär yozaq häm saq astında totıla. Menä şuşı soñğı waqıyğalar, Başqortstan tatar milli xäräkäte oyışmaları wäkilläre äytüençä, tatar cämägätçelegeneñ sabırlığın cuydırdı häm alarnı qatğıy adımnarğa barırğa etärde. Tatar oyışmaları Başqortstan xaqimiätlären kiläse atnanıñ düşämbesennän üzläreneñ qarşılıq aqsiäsen başlayaçağı xaqında kisätep, alarğa räsmi xatlar yullağan. Älege piketqa respublik citäkçeläre irek quyarmı, ällä militsiäne eşkä cigep, Aq yortqa ber çaqrım qala uq barlıq uramnarnı bikläp quyarmı, monısı düşämbe könne bilgele bulır.

XS
SM
MD
LG