Accessibility links

сишәмбе, 6 декабрь 2016, Казан вакыты 08:53

Yätim balalar xaqına xäyriä konsert


Yätimlektän küñelläre räncetelgän şuşı balalar arasında fizik yaqtan awıruçılar da şaqtıy küp. Qazannıñ berençe balalar xastaxanäsendä yatqan awırular arasında da änä şundıy böten yaqtan räncelgän sabıylar bar. Şifaxanädä yatuçı taşlanğan balalar sanın xätta tögäl itep äytep tä bulmıy, çönki ul san kön sayın, säğät sayın üzgärä.
Küp oçraqta ata-analarnıñ eçkeçelege näticäsendä yätim qalğan bu balalar törle çirlär, şul isäptä baş mie zararları, rak kebek qatlawlı awırular belän yata. Şifaxanädä şulay uq saw-sälämät yätimnärne dä kürergä mömkin. Alar biregä balalar yortınnan meditsina tikşerüen ütär öçen genä kiterelgän bula. Bolarnıñ, älbättä, yaña ata-ana nazın tatu mömkinçelege dä kübräk.
Mondıy balalarğa yärdäm itü iñ izge eşter. Andıy märxämätlelek bügen bik siräk oçrıy. Yätimnärgä iğtibar itü küp oçraqta däwlät byudjetınnan tügel, ä ayırım şäxeslärneñ qorı initsiativası belän buldırıla. 12nçе fevral'dä kiçke säğät altıda ğalimnär yortında ütäçäk konsert näq şuşındıy maqsatlar belän ütkäreläçäk. “Most” yäğni küper dip isemlängän yäş estrada-djaz törkeme xäyriä konsertı oyıştıra. Oyıştıruçılar bilet xaqın 30 sumnan alıp quyğannar. 30 sum çik tügel, telägän keşe xälennän kilgänçä artığraq ta tüli ala. Häm şuşı aqçalar turıdan-turı berençe xastaxanädä yatqan yaña tuğan sabıylarnı däwalawğa totılaçaq.
Şulay itep, şimbä kiçendä Qazannıñ ğalimnär yortına estrada-djaz muzıkası yätimnär faydasına yañğırayaçaq. Mondıy izge eşkä sänğät'kärlär häm muzıka söyuçelär kümäkläşep totınsa, yätimnär yazmışı beraz bulsa da ciñeläyer.
Al'bina Zäynulla, Qazan.

XS
SM
MD
LG