Accessibility links

шимбә, 10 декабрь 2016, Казан вакыты 14:00

Blağoveçendağı waqıyğalar öçen jurnalistlarnı ğayeplädelär


Uzğan proğrammabızda xäbär itelgänçä, atnaqiç könne Ufada Başqortstan Däwlät Cıyılışı – Qorıltaynıñ çirattan tış utırışı bulıp ütte. Anda uzğan yılnıñ dekäbr ayında respublikanıñ Blağoveçen şähärendä bulğan waqıyğalarnı tikşerü kön tärtibeneñ töp mäsäläse itep kertelgän ide. Qorıltayda Blağoveçen şähärendä ber atnalıq tikşerü eşlären tämamlap qaytqan parlament törkeme xisap tottı. Qorıltayda söylängän süzlär xaqında respublikanıñ räsmi matbuğatı köne-töne xalıqqa citkerep tora. Cämägätçelekneñ dä iğtibar üzägendä bu tema. Qorıltay deputatlarınıñ häm respublika citäkçelegeneñ Blağoveçendağı waqıyğalarğa qarata fikerläre respublika cämägätçelegendä, yomşaq qına itep äytkändä, bik tä qarşılıqlı xis-toyğılar uyattı. Qorıltaydağı xisaptan, anda yasalğan küpçelek çığışlardan şundıy näticä yasap bula: bäy Blağoweçenda respublika milisiä qatnaşlığında ütkärelgän "tärbiäläw" ğämällärendä xoquq saqlaw orğannarı wäkilläre tügel, ä bäysez jurnalistlar häm alarnı «qotırtuçı» keşe xoquqların yaqlawçılar ğayeple ikän bit. Härxäldä, Däwlät Cıyılışı-Qorıltayda çığış yasağan keşelärneñ bik aqıllı çığışlarınnan şul añlaşıla. Blağoveçen waqıyğaların tikşergän parlament komissiäse räise Fänil Taipov üzeneñ ozın çığışında, küpmeder däräcädä bu şähärdäge şaw-şulı xällärdä militsiä xezmätkärläreneñ dä ğayebe barlığın tanıdı-tanuın, ämma anıñ fikerençä, älege aksiägä milisiä çarasızlıqtan barğan ikän häm alar nigezdä qanun qısalarında xäräkät itkän. Şul uq waqıtta Taipov äfände süzlärençä, şuşı yuq qına waqıyğanı, bäysez jurnalistlar da, Mäskäwdän kilgän keşe xoquqların yaqlawçılar da küpertep kürsätkän. Alar kemnärneñder zakazın ütägän, dide Taipov. Utırışta, älbättä, başqa törle çığışlar da buldı. Misal öçen, oppozisiä deputatları Edward Murzin belän Gennadiy Şabayev, härwaqıttağıça, üzgä fikeren citkerde. Alarnıñ süzlärençä, Blağoveçendağı waqıyğalarğa jurnalistlar häm keşe xoquqların yaqlawçılar cämägätçelek iğtibarın cälep itmäsä, bu xällärne şul kileş belgertmi genä yomıp qaldıraçaqlar ide. Ä xäzer jurnalistlar belän keşe xoquqların yaqlawçılar ğayeple bulıp çıqtı. Milisiä xezmätkärläreneñ xezmät xaqı az bulu, yäki başqa problemnarı alarğa başbaştaqlıq qılırğa yarıy digän süz tügelder iç. (audio) Däwlät Cıyılışında çığış yasağan respublika Eçke eşlär ministrı Rafail Diwayev, aldan uq kötelgänçä, üze citäklägän vedomstvonıñ abruyın yaqlap yalqınlı çığış yasadı. Anıñ süzlärençä, Blağoveçen şähärendäge xällärne bar Rusiägä söyläp, qayber matbuğat çaraları häm keşe xoquqların yaqlawçılar Başqortstan milisiäsenä çirattağı tapqır qara yağu mömkinlegen aldı. Şul uq waqıtta Rafail Diwayev Başqortstan milisiäseneñ uñışları xaqında söyläwgä küp waqıt bülde. Başqa çığış yasawçılar da respublika milisiäsen bik xislänep yaqladı. Prezident Räximov isä milisiä xezmätkärlären üzeneñ ışanıçlı qanatı astına aluın açıqtan-açıq belderde. Jurnalistlar belän keşe xoquqların yaqlawçılar adresına zähärle süzlären attı ul. «Mäskäwneñ distälärçä yıl buyı berqayda da eşlämägän keşe xoquqların yaqlawçıları qaydan xezmät xaqı ala, närsä isäbenä yäşi, dip soraw birä prezident häm üze ük şul sorawğa cawap ta birä. Ul keşe xoquqların yaqlawçılar zur aqçalarğa kemnärneñder zaqazların üti häm haman da Başqortstannıñ säyäsi citäkçelege belän anıñ militsiäsenä pıçraq ata». Azaqtan prezident bäysez jurnalistlar isemenä dä usal süzlären yawdırdı häm alarnı mäxkämägä birergä kiräk dip äytte. Şulay itep, atnaqiç könne Başqortstan Däwlät Cıyılışı qorıltayda bulğan söyläşü respublika cämägätçelege iğtibarı üzägendä qala häm ul qapma-qarşılıqlı fikerlär uyattı. Xakimiätlär üz ğayeben tanu urınına, şul ğayepne başqalarğa tağarğa mataşa, digän fikerlär xalıq arasında torğan sayın yışraq yañğırıy xäzer.

XS
SM
MD
LG