Accessibility links

якшәмбе, 4 декабрь 2016, Казан вакыты 03:03

Röstäm Miñnexanov Tarix institutı ğalimnäre belän oçraştı


Tatarstan Fännär akademiäseneñ Tarix institutı soñğı distä yıl eçendä zur ğına eşlär başqardı. Qazannıñ 1000гына äzerlänü, millät üseşe, tatar xalqınıñ ütkänen häm ruxi mirasın obyektiv çağıldıru yaña burıçlar da quya. Şimbä könne älege fänni oyışmada siräk oçrıy torğan waqiğa buldı. Tatarstan prem'er-ministrı Röstäm Miñnexanov üzeneñ urınbasarı Zilä Wälieva belän Kremlevskaya uramındağı Tarix institutına kilde. Rafail Xäkimov citäklägän şuşı institut ğalimnäre häm xökümät başlığı arasında eşlekle häm ixlas fiker alışu buldı. Forsattan faydalanıp, Röstäm Miñnexanov Rafail Xäkimovnı tuğan könne belän qotladı. Ul Tarix institutı xezmätkärlärenä ekspeditsiälärgä yörergä caylı bulsın öçen PAZ avtobusın büläk itte. Tatar tarixın öyränü häm fänni tikşerenülärne alıp baruda xökümät yärdämeneñ kübräk kiräk buluı turında da fiker alışu bulğan anda. Röstäm Miñnexanov şuşı institut häm Bötendönya tatar kongressı Başqarma komitetı tarafınnan tözelgän etnologik monitoring üzägeneñ eşen kiñräk cäyelderü öçen kiräkle aqçalata yärdäm birergä dä wäğdä itkän. Gumanitar fännär belän şöğellänüçe ğilmi üzäklär mondıy iğtibar häm yärdämgä härwaqıtta moxtac ikänlege bu oçraşudan soñ tağın da yaxşıraq añlaşıldı.

Soñğı waqıtta här şimbä, yäkşämbe säyäsi belderülär, cıyılışlar, mitinglar könenä äylänep bara. Böten Rusiädä taşlamalarnı aqçalata öläşü, toraq-kommunal' reforması quzğatqan säyäsi aktivlıq köçäygändä, Tatarstan da başqalardan qalışmıy. Şimbä könne Berdäm Rusiä firkäseneñ Tatarstan bülekçäse ofisında respublikanıñ 30dan artıq ictimaği oyışması aktivistları cıyılışı ütte. Monda kilüçelär Putinnıñ reformaların häm säyäsi kursın yaqladılar. Mixail Fradkov xökümäteneñ otstavkağa cibärelmäwen Tatarstan Däwlät Şurası räise Färit Möxämmätşin häm ul citäklägän Berdäm Rusiä firkäse bülekçäse xuplap çıqtılar. Ul reformalar nigezendä sotsializm qaldıqlarınnan häm taşlamalar sistemasınnan qotıluğa omtılış yata, dip belderde. Putin mondıy reformalarğa totınıp qıyulıq kürsätte häm bez anı yaqlarğa tieş, dip äytte üzeneñ çığışında Färit Möxämmätşin. Cıyılışta Rusiä prezidentınıñ säyäsäten häm kiñ qolaçlı reformalarnı yaqlaw, cämğiättä tınıçlıq häm tatulıqnı saqlaw kiräklege turında rezolyutsiä dä qabul itelde.

Gölnaz İlgizär

XS
SM
MD
LG