Accessibility links

якшәмбе, 11 декабрь 2016, Казан вакыты 03:19

Çista bädräf häm tigez yullar bulsa turistar Tatarstanğa kilergä riza


Qazanda turistik şähärlärne reklamalawğa bağışlanğan konferensiä ütte. Anda qatnaşuçılar, berençe çiratta, Qazanda çittän kilüçelärgä kürsäterlek äyber bar, digän fiker belän kileşte. Ämma Tatarstannı häm anıñ başqalasın turistik «Mäkkä»gä äyländerer öçen, bixisap qatlawlı problemalarnı xäl itärgä kiräk. Konferensiä reklamağa bağışlanğan bulsa da, tturistik şirkät citäkçeläre tigez, şoma yullar bulmaw, restoran, qunaqxanä, kibet, yal itü häm küñel açu urınnarında yuğarı däräcädäge xezmät kürsätelmäw turında äytep kitte. Aña da qaramastan, yal oyıştıru belän şöğellänä torğan şirkätlär, turistlarnı qabul itä alğan. «İdel buyı» säyäxätläre şirkäte başlığı Smolin Vyaçelsav äfände süzlärençä, karaplarnıñ yarğa kilü urınnarı gel yabıq bula. Yılğa portı citäklege belän bu mäs’älädä urtaq tel taba almıybız, dide ul. 15 meñ turist qabul itep tä, qarap xucalarına porttağı oyışmağanlıq, başqalarnıñ mänfäğätlären qayırtmaw kebek qayınlıqlarğa oçrarğa turı kilä. Konferensiädä çığış qatnaşqan «Vera-tur» şirkäte wäkile, çit il qunaqların Qazanda qabul itü täcribäse belän büleşte. Mäsälän ütkän yılnı alar, şähärdä tieşle şartlar bulmıy torıp ta, İspaniä häm Qıtaydan turistlar törkemnären qabul itkän. Tatarstannıñ tarixi mirası belän cälep itü eçendä, Tarix institutı ğalimnäre dä yärdäm itärgä riza, ämma alarğa möräcäğät itüçelär az, dip söyläde ğalim Ayrat Ğabdullin. Konferensiädä turizm öçen cawaplı däwlät oyışmaları wäkilläre dä qatnaştı. Alar, bu ölkädä üseşkä ireşer öçen küpme eş başqaruları turında söyläde. Ämma, däwlät programmaları, kürgäzmälär turında küpçelek turistik şirkätlär belmi bulıp çıqtı. Yullarnı tözekländerü, zamança transportnı buldıru kebek mäsälälärne, eşmäkärlär şähär başlığı aldında quymaqçı ide. Ämma Kamil İsxaqov alar belän oçraşuğa kilmäde.

Konferensiädä, turistik urınnarnı reklamalaw belän şöğellänä torğan çit il belgeçläre dä qatnaşıp, täcribä belän urtaqlaştı. Mäsälän, Eston xalqınıñ milli bizäkläre ilneñ berdäm turistik bilgeläre bulıp xezmät itä. New York citäkçelege, bu şähärgä kilergä çaqırıp tora torğan häm anda yäşäwçelärne dä üz şähären yaratırğa öyrätä torğan sotsial reklama yasata ikän. Tatarstanda da küpmeder däräcädä andıy eş bara, ämma turistik bazarda eşläwçe şirkätlär, qunaqxanälär, restoran xucaları, tärcemäçe häm başqa xezmät kürsätüçelär, Tatarstannı tanıtu eşen aktivrak alıp barırğa kiräk, dip sanıy.

Bikä Timerova.

XS
SM
MD
LG