Accessibility links

дүшәмбе, 5 декабрь 2016, Казан вакыты 23:52

Ğiraqnıñ Kirkuk şähärendäge cirle saylaw näticäläre şähärdä millätara kierenkelekne arttıra ala


Ğiraqta saylawlar ilneñ yaña parlamentına ğına tügel, cirle şuralarğa da uzğan die, xörmätle tıñlawçılar. Berniçä törle millät wäkilläre yäşägän häm ara-tirä milli kierenkelek çığıp torğan Kirkuk şähärendä şuradağı küpçelekne kördlär yawladı, bu isä yänä andağı millätara mönäsäbätlärne kierenkelätte. Başqa milli törkemnär xäzer kördlärne saylaw näticälären bozuda ğäyepli.

Ğiraq tönyağındağı Kirkuk şähärendä kördlär inde menä niçänçe kön bik kütärenke ruxta - 30-nçı ğinwarda uzğan saylawlarnıñ näticäläre, alarnıñ şähär şurasında bar urınnarnıñ 60 protsentın yawlap aluın kürsätä. Moñardan tış körd partiäläre bar il buylap ta zur uñışqa ireşte - Ğiraqnıñ bäysez saylaw komissiäse iğlan itkän mäğlümatqa qarağanda, alar Bagdadtağı yaña Milli mäcles saylawlarında tawışlarnıñ 26 protsentın qazanğan. Läkin kördlärgä bu bäyräm itü öçen çınnan da yaxşı mömkinlek birsä, başqa milli törkemnär ber dä qänäğät tügel, bigräk tä törle millät wäkilläre yäşägän Kirkukta. Andağı törkmännärneñ citäkçelärennän berse Färüq Abdulla äle yäkşämbe könne ük, "bez saylaw näticälären tanımıybız, bez saylaw komissiäsenä Kirkuk kördläreneñ törle qanun bozuları turındağı däğwalarnı inde citkerdek" dip äytte. Törkmännär belän bergä zur qänäğätsezlek xislären ğäräp häm xristian törkemnäre dä belderä. Saylawlarğa qädär Kirkuknıñ şähär şurasındağı urınnar törkmännär, kördlär, sönni ğäräplär häm azraq sanlı xristian ässüriännär arasında bertigez bülengän ide. Londondağı Suğış häm Solıx çorı xäbärläre institutınıñ tönyaq Ğiraqta eşlägän xezmätkäre Hiwa Osman süzlärenä qarağanda, Kirkukka amerikannar kilgännän birle anda ğämäldä bulğan här tarafqa da bertigez urın birü ğädäte asılda şul taraflarnıñ bersen dä qänäğätländermägän ide.

Audio, Hiwa Osman

"Kirkuktağı här milli törkem üzen anda küpçelek dip, ä qalğannarnı azçılıq dip kürä. Şuña kürä, berkem dä başqalar belän tiñ bulunı üze öçen ğädel tügel dip isäpläp kilde häm şuradağı urınnarnı bertigez bülüne problemanı xäl itü yulı bularaq tügel, ä barı tik simvolik ber çişeleş itep kenä bäyäläde" di Hiwa Osman. Xäzer inde, saylawlardan soñ, ottırğan taraflar kördlärneñ bu ciñüe belän niçek kileşer soñ digän soraw tua. Yaña şura aldında şaqtıy awır burıçlar, berençe çiratta, şähärdäge mal-mölkät problemaların xäl itü kebek qatlawlı mäs''älä tora. Saddam zamanında meñlägän körd bu yaqlardan quılıp, alar urınına ğäräplär kiterep urnaştırılğan ide. Elek kördlär yäşägän yortlarnıñ kübesendä xäzer ğäräp ğailäläre yäşi häm alar ilneñ başqa töbägenä kitep yaña tormış başlarğa cıyınmawı xaqında belderä. Osman, elekke amerikan idaräse şähärdäge mölkät däğwaların terki başlağan ide, ämma ul ällä ni alğa kitä almadı di:

Audio, Hiwa Osman

"Töp mäs''älä bulıp Kirkukta milek mäs''äläse tora. Amerikannar Ğiraqnıñ Milek däğwası komissiäsen tözep qarağan ide, läkin bu bernigä dä kitermäde, çönki alar barı tik däğwalarnı gına terkäde, ä soñğı xökem çığaru belän mäşäqätlänmäde" di tönyaq Ğiraqta eşläwçe Hiwa Osman. Distälägän meñ körd yıllar buyı çittä yäşägännän soñ xäzer kire Kirkukka qayta häm alar älegä şähär çitendäge alaçıqlarda kön kürergä mäcbür. Şähär şurasında kördlärneñ östenlek itüe şuşı milek dawlaw eşlärendä körd mäxälläsenä küpmeder östenlek birä, dimäk Kirkuktağı millätara kierenkelekne tağın da arttıra ala.

Kärim Kamal
XS
SM
MD
LG