Accessibility links

Кайнар хәбәр

İlham Şakirovqa Tatarstan ordenı tapşırıldı


Nihayät, Tatarstan respublikası aldındağı qazanışları öçen digän respublika ordenınıñ berençe xucası bilgele buldı. Älege orden inde 2004 yılda uq buldırılğan bulsa da, anı berençe bulıp tapşırırlıq keşe şuşı köngä qädär bilgelänmägän ide. Sişämbe könne Tatarstan prezidentı Mintimer Şäymiev respublikanıñ iñ yuğarı bülägen mäşhür tatar cırçısı İlham Şakirovqa tapşırıldı. Bu cırçınıñ 70 yıllıq yubileyına bağışlanğan Kamal teatrı binasında uzğan kiçädä buldı. Kiçädä İlham Şakirovnı qotladılar, anıñ xörmätenä matur süzlär häm cırlar yañğırattılar. Ä tantanalı kiçä aldınnan Mintimer Şäymiev cırçı belän bergä anıñ yaña fatirın barıp qaradılar. Bu büläk İlham Şakirovqa xökümät tarafınnan tuğan köne uñayınnan tapşırıldı. Ä Qazanda 16 fevral’ könne İlham Şakirov isemendäge cır bäygese başlanıp kitte.

Tatarstanğa da çärşämbe könne qar-burannar kilep citte. Qazanda 16 fevral’dä köne buyı qar yawdı, buran qotırındı. Şähär xakimiäte mäğlümätlärenä qarağanda, başqalanıñ uramnarında 300dän artıq maxsus yul çistartu caylanmaları eşlägän. Töngä alar sanı tağı da artırğa tieş. Läkin şuña da qaramastan, Qazan uramnarında qar körtläre üsä genä bara, maşina bökeläreneñ sanı da artıp qına tora. Läkin buranğa da qaramastan, Qazannıñ aeroportı köndez ğädäti rejimda eşläde, ber oçqıç ta borılıp kitmäde. Oçqıç digännän, şuşı könnärdä genä Qazannıñ Gorbunov isemendäge aviaberläşmäse Transaero şirkäte häm Finans lizing kompaniäse belän kileşü tözede. Anıñ nigezendä 2005-2007 yıllarda qazanlılar 10 TU-214 oçqıçın yasap sataçaq. Alar belän Rusiäneñ Transaero şirkäte qullanaçaq, ä oçqıçlarnı citeşterüne finanslawnı üz östenä küptän tügel genä tözelgän Finans lizing kompaniäse alaçaq. Monıñ öçen älege kompaniägä 600 million dollar kiräk bulaçaq. Şulay itep, Qazan aviatözüçeläre kiläse berniçä yılğa eş belän tä’min iteläçäk.

Gölnaz İlgizär

XS
SM
MD
LG