Accessibility links

якшәмбе, 4 декабрь 2016, Казан вакыты 07:03

Yekaterinburgta yaña säyäsi dulqın


Yekaterinburg şähärendä yaña säyäsi dulqın başlandı. 20 martta şähär dumasına bulıp uzaçaq saylawlarğa tulı äzerlek bara. Million yarımnan artıq xalqı bulğan şähärne 35 okrugqa büldelär. Här okrugtan berär keşe xalıq ışanıçın aqlap, şähär idäräse orğanında xezmät itärgä tieşle.

Bu xoquqnı yawlaw öçen köräşergä bügenge köndä 285 kandidat teläk belderde. Şularnıñ tuğızı tatar keşese. Yekaterinburgta 100 meñnän artıq tatar häm başqort xalqı yäşi. Alar arasınnan tuğız keşeneñ idärä organnarına saylanırğa teläk belderüe maqtawlı küreneş, älbättä. Ämma biredä borçıldıra torğan ber närsä küzgä taşlana: 35 okrugnıñ öçesendä ikeşär tatar keşese köräşäçäk, yäğni, köçleräk tatarlar ütmäsen öçen, tatar familiäsenä qarşı ikençe tatar familiäsen quyğannar. Bu bigräk tä tatarlarnıñ küpläp, tuplanıbraq yäşi torğan rayonnarında, mäsälän, El'maş, Uralmaş, Vtorçermet digän mikrorayonnarda küzätelä.

Şähär dumasına saylanırğa telägän tatarlar arasında bik layıqlıları bar. Alar arasınnan öçesen bilgeläp ütärgä bula. Öçese dä tanılğan eşquarlar. Berençese, Milli Media-Xoldingnı ğämälgä quyuçılardan berse Rinat äfände Sadriev tatar milläte öçen bik küp igelekle eşlär başqaruı belän tanılğan şäxes. Rafail' Şixov belän Oleg Xäbibullin isä şulay uq bik ömetle, yäş, namuslı yegetlär.

Ğomumän, layıqlı tatarlarnıñ yuğarı xakimiät dairälärenä saylanuı millätne kütärer ide. Şuña kürä şähärdäge tatar milli oyışmaları bu arada eşçänlekne qüätländerep cibärdelär. Şähärneñ törle rayonnarında olı yäştäge millättäşlärebez belän oçraşu kiçäläre, yäşlär öçen diskoteka, yal kiçäläre oyıştırıla. Mondıy kiçälär garmun moñı, cır-biyu belän därtle, küñelle itep uzdırıla. Törle konsertlar quyıla. Zur-zur artistlarnıñ tüläwle konsertlarına yöri almağan olı yäştäge abıylar-apalar, matdi yaqtan maqtanırlıq xäle bulmağan pensionerlar öçen buşlay konsertlar çıp-çın zur bäyrämgä äwerelä.

Mondıy çaralarnıñ uñay yaqları bäxässez, älbättä. Ämma nigäder küñel tınıç tügel. Milli oyışmalar xalıqqa çın küñeldän xezmät itär öçen säyäsi etärgeç kiräk bulıp çığa tügelme soñ? Qızğanıçqa qarşı, milli eşlär alıp baru öçen matdi nigez bulmaw şuşı xälgä kiterä.

Yekaterinburg şähäreneñ çitendä urnaşqan Sadovıy bistäse mädäniät yortında, bistädä meñnän artıq tatar häm başqort xalqı yäşäwen iskä alıp, “Yaña ğasır” sputnik telekanalı tapşıruların qararğa yaraqlaştırılğan sputnik antenna häm televizor komplektı quyıldı. Küptän tügel biredä “Yaña ğasır” televideniese tapşıruların täqdir itü kiçäse dä oyıştırıldı. Xalıq bu yañalıqnı bik quanıp qarşı aldı.

Xäzer inde Sverdlov ölkäsendä tatarlar kümäkläşep qarıy ala torğan 43 urında şundıy komplektlar urnaştırılğan. Monnan tış, Yuğarı Pışma, Berezovskiy, Rewda, Krasnotur'insk, Pervoural'skiy, Yekaterinburg kebek zur şähärlärdä TNV tapşıruların kabel' televideniese çeltäre arqılı qaraw mömkinlege bar. Moña qädär Tatarstan tapşıruların qarawçılar öçen tapşırular programmasın aldan belep toru mä’säläse çişelmägän ide. Xäzer, nihayät, bu problema xäl itelde. Tatarstannıñ Uraldağı daimi wäkile Rawil' Bikbov daimi räweştä “Yaña ğasır” televideniese citäkçeläre belän dä, Sverdlov ölkä gazetası citäkçeläre belän dä alıp barğan söyläşüläre näticäsendä, bu könnärdä tapşırular programmasın ölkä gazetası bitlärendä bastıru mömkin buldı.

Televizor qarawçı tatar tamaşaçıları öçen bu bik quanıçlı waqiğa. Tatarstan tapşıruların kümäkläşep qarıy torğan urınnarda küptän kötälär ide bu xälne. Monnan tış, Sverdlov ölkäse külämendäge iñ abruylı, zur ölkä gazetası bitlärendä TNV kanalı tapşıruları programması basıla başlaw bu kanalğa qarata başqalarnıñ da iğtibarın köçäytte, qızıqsınuçanlığın arttırdı. Bu Tatarstan tapşıruların qarawçılar sanı artır digän fiker tudıra.

Fäwiä Safiullina

Yekaterinburg

XS
SM
MD
LG