Accessibility links

Кайнар хәбәр

Rusiädä sovet çorına xas watandarlıq xislären tärbiäläw köçäyä


Rusiädä yaña "yoldız" tuarğa tora, bu yulı şulay dip atalaçaq televizion kanal räweşendä, xörmätle tıñlawçılar. Älegä Mäskäw häm anıñ tirälärendä, ä may ayınnan bar il buylap kürep bulaçaq şuşı telekanal Rusiä tamaşaçısında sovet çorına xas watandarlıq, xärbi köçlärgä mäxäbbät tärbiälärgä cıyına. Şuşı telekanalnı oyıştıru niäten Rusiäneñ saqlanu ministrlığı yaqlıy häm üz yağınnan xätta texnik yardäm dä wäğdä itä.

Audio, cır

Rusiä xärbiläre üzlärenä yaña "yoldız" östi, yäkşämbedä Mäskäwdä "Zvezda" telekanalı eşli başlayaçaq. Ägär dä bar äzerlek tä uñışlı ğına ütsä, 23-nçe fivral''dän soñ ul üz tapşıruların könenä inde 12 säğät däwamında alıp baraçaq. "Zvezda"nı oyıştıruçılar arasında Rusiä saqlanu ministrlığınıñ üzäk teleradiotapşırular üzäge dä bar häm telekanalnıñ eşe başlanuı xaqında da berniçä kön elek näq menä saqlanu ministrlığında iğlan itelgän ide. "Zvezda" telekanalı şulay itep ildä xärbi-watandar tärbiäne köçäytü maqsatın quya. Saqlanu ministrı Sergey İvanov inde berniçä yıl däwamında Rusiädäge xäzerge telekanallarda kiñ cäyelgän ciñelçälek, gel küñel açu yäisä sex kürsätügä qarşı ayırım ber watandar televidenie buldıru kiräklege turında söyläp kilde. Küptän tügel genä ul xökümät utırışında da, Rusiäneñ telekanalları xalıqnı diwanalaştıru eşen alıp bara dip beldergän ide. Keşelärdä elekke sovet çorına xas watandarlıq xislären torğızu zaruriate turında berniçä märtäbä prezident Putinneñ dä äytkäne buldı. "Zvezda"nıñ mödire Sergey Savuşkin süzlärenä qarağanda, anda tapşırular kiñ qatlam öçen äzerlänäçäk häm alar üz eçenä törle filmnar, tamaşalar, dokumental'' äsärlär, xäbärlär, xätta balalar öçen multfilmnarnı da alaçaq. Savuşkin, bar programmalar da uñay eçtälekle, cämäğät mänfäğätlären qayğırta torğan bulaçaq, reklama isä Rusiä mallarına ğına yasalaçaq dip belderä. Şul tapşıruları belän "Zvezda"nı oyıştıruçılar ildäge tamaşaçnı ğına tügel, ä ike-öç yıl eçendä elekke sovet cirlärendä yäşäwçelärne dä cälep itärgä ömetlänä. Läkin Rusiädäge başqa telekanallarnıñ çınnan da şaqtıy şikle häm, qayberäwlär fikerençä, tozsız programmalar kürsätüe sürätendä dä, yaña watandar wä sotsial''-äxlaqi "Zvezda"nıñ kiläçäge älegä alay ömetle kürenmi. Elek Saqlanu ministrlığınıñ matbuğat wäkile, ä xäzer "Komsomolskaya Pravda" basmasında xärbi küzätüçe bulıp eşlägän Viktor Baranets bu xaqta menä närsä uylıy:

Audio, Viktor Baranets

"Min, xökümäte üz keşelärenä artı belän borılğan ildä watandarlar tärbiäläw mömkin dip uylamıym. Sez ğäskär keşesen şıqsız xakimiat belän yoqlata almıysız. Miña küp kenä xärbilär, bez qaraq oligarxlarnı, üz kesäsen genä qayğırtqan deputat, ministrlarnı yaqlarğa telämibez dip yaza. Üz xakimiaten kürä almağan ğäskär bernindi mi yuuğa da bireşmiäçäk" di üze qayçandır saqlanu ministrlığında eşläp kitkän Viktor Baranets. Ul "Zvezda" telekanalı tapşıruların nindi watandar eçtälek belän tutıru ölkäsendä dä problemalar kürä.

Audio, Viktor Baranets

"Alar närsä belän watandarlıq tärbiälärgä cıyına soñ? Andıy eçtälekle filmnarnıñ 99 protsentı sovet çorında töşerelgän ide. Şunı añlarğa tieşsez, alarnı qarağanda sezdä watandarlıq tügel, ä sağınıçlı näfrät uyanaçaq, çönki sez üz ğäskärilären qayğırtqan elekke rejimnı küräçäksez, ä xäzerge xakimiat monı eşlämi", di "Komsomolskaya Pravda"nıñ xärbi küzätüçese Viktor Baranets. Läkin şuşı şik-şöbhälärgä qaramastan, "Zvezda" telekanalı üz eşen başlarğa äzer tora, şunnan soñ üz telekanalın buldıru eşenä Urıs pravoslav çirkäwe dä kereşer digän farazlar da bar. Patriarx Aleksi dä, başqa pravoslav ruxanilär dä Rusiädäge xalıqnıñ ruxi sawlığın qayğırtu, Watannı söyu, pravoslav qimmätlärne nığıtu kiräklege, monı maxsus televideniä yardämendä eşläw mömkinlege turında berniçä märtäbä beldergäne buldı.

Audio, cır

Kärim Kamal
XS
SM
MD
LG