Accessibility links

шимбә, 10 декабрь 2016, Казан вакыты 17:34

Rusiä ğäskärläre Çeçnädä yaña qorallar sınaw eşen alıp bara


Rusiäneñ saqlanu ministrlığı mäğlümatına qarağanda, çäçän suğışçılarına qarşı suğışqan federal'' köçlär Çeçnädä yaña qorallar häm xärbi cihazlar sınaw eşlären dä alıp bara. Saqlanu ministrınıñ berençe urınbasarı Aleksandr Belousov, şundıy sınawlarnı uñışlı ütkän qayber qorallar bıyıl inde küpläp citeşterelä başlayaçaq dip belderde.

General Belousov Rusiäneñ İTAR-TASS agentlığına, Çeçnädä xärbi şartlarda sınalğan häm xäzer küpläp citeşterügä çığarılğan qorallar arasında märgän mıltığı häm berniçä tönge küreneş cihazı bar dip beldergän ide. Mäskäwdäge bäysez xärbi belgeçlärneñ berse Pavel Felgenhauer süzlärençä, Rusiä qorallı köçläreneñ Çeçnädä yaña qorallar sınawı ällä ni zur ser tügel, ägär dä andıy qorallarnı qullanu tıyılmağan ikän, monıñ bernindi dä naçar yağı yuq dip isäpli.

Audio, Pavel Felgenhauer

"Minemçä, Çeçnädä qorallar sınawnı berkem dä şik astına almadı. Räsmi töstä alar anda xäzer zur suğışlar barmıy dip belderä, läkin anda çınnan da şaqtıy citdi qorallar sınala" di Pavel Felgenhauer. Anıñ süzlärenä qarağanda, Rusiä xärbiläre Çeçnädä "Çernaya Akula" digän boralaqnı da sınap qarağan bulğan, läkin alar anı ışanıçsız dip tapqan. Anıñ urınına Rusiä saqlanu ministrlığı "Tar-mar" digän Mi-28 boralağın citeşterä başlarğa kiräk digän qararğa kilgän. Rusiä qoralları belän problema şunda ki, alar naçar eşlängän tügel, alar zamanadan artta qalğan, di Felgenhauer. Audio, Pavel Felgenhauer

"Ğomumän alğanda, eçke eşlär ministrlığınnan bulsın, saqlanu ministrlığınnan bulsın, yä başqa qüwät oyışmasına qarağanımı, bezneñ ğäskärilär bik naçaq qorallanğan" dip belderä ul. Çäçän suğışçıları da asılda federallar tösle şul uq sıyfattağı qorallarğa iä, ä menä elemtä ölkäsendä alarda cihazlar urıs ğäskärlärenä qarağanda, yaxşıraq. Pavel Felgenhauer, ğäskärlärgä xäzer zamança qoral cibärsäñ dä, alar anı qullana almayaçaq, çönki alarnıñ moña beleme citmi dip belderä. Ul general Belousov belderüeneñ xärbi-texnik yağın bäyäläsä, Extremal'' jurnalizm üzäge citäkçese Oleg Pamfilov säyäsi yağına iğtibar itä, häm "bu qotoçqıç belderü bulıp tora, çönki Yeltsin dä, Putin dä Çeçnägä qarşı suğış alıp baruın beldermäde" dip, Mäskäw xäzer üz cirendä, üz xalqına qarşı suğışta qoral sınawın tanıy bulıp çığa di.

Audio, Oleg Pamfilov

Näq şuña uq iğtibarnı İnguşetiädä "Memorial" törkeme öçen eşläwçe Usam Baysayev ta cälep itä.

Audio, Usam Baysayev

"Üz watandaşlarıña qarşı qorallarnıñ iskese dä, yañası da qullanılmasqa tieş, alarnıñ ayırması yuq, bu normal'' närsä tügel" di "Memorial" xezmätkäre.

Kärim Kamal
XS
SM
MD
LG