Accessibility links

җомга, 9 декабрь 2016, Казан вакыты 03:03

Tubılda "Xizbut Taxrir Äl-İslami"çılarnı xökem itälär


"Xizbut-Taxrir Äl-islami" oyışmasına kergän dip uylanılğan yegetlär östennän başlanğan mäxkämä Tubıl şähärendä zur şaw-şu tudırdı. “Azatlıq” radiosın tıñlawçılarğa “Xizbut-Taxrir”gä kergännärneñ qulğa alınuları turında cäy başında xäbär itkän idek. Menä 7 aydan artıq tikşerü eşe alıp barılğannan soñ alar Tubıl şähäre mäxkämäse aldına bastı. Timer räşätkä eçendä 5 äw, ä 4 yegetkä tikşerü eşe barğanda şähärdän çığıp yörü tıyılğan ide.

Şaw-şu häm zur qızıqsınu tudırunıñ säbäplären barlasaq, äle moña qädär seber cirendä ekstremizmda ğayeplänep, mäxkämä aldına basuçılar bulmadı. Yegetlärneñ öçesennän qala barsı da tatarlar: Tömän, Tubıl häm Yärkäw yağı keşeläre. Qalğannarına kilsäk, Pitriçenko Germaniädä tuğan, Ukrainada üskän, islam dinen qabul itkän. Alişer isemle yeget Tacikstannan. Tağın beräw Başqortstannan. Şunlıqtan mäxkämä başlanır aldınnan tatar ictimağıy oyışmaları wäkilläre dä, dini xäräkät äğzaları da, äti-änilär, tuğan-tumaçalar, yaqlawçılar, här gäyeplänüçeneñ üz advokatı, mäğlümät çığanaqları wäkilläre belän zal tulğan ide. Mäxkämägä qädär ük Tömän ölkäseneñ baş prokurorı Ernest Wäliev bu eşkä mönäsäbättä mondıy añlatma birde. Ernest Wäliev: Речь ни в коем случае не идет о преследованию за веру. Речь идет об уголовном проследование за конкретное уголовное преступление. За создание экстремисткой организации, действие которой в стране запрещено. Ğayepläwne ölkä prokurorı yärdämçese Anatolıy Kopeyko uqıdı. Ğadi genä itep äytkändä, yegetlär, Rusiä Federätsiäsendä tıyılğan oyışmağa kerüläre, milli nizaq çığarırğa mataşuda, tıyılğan ädäbiät taratuda, qoral satıp alırğa cıyınuda häm xakimiätne cimerep islam xaliflege oyıştırırğa teläwdä geplänä. -Bu eş küpterep, aştırıp yasalğan. Alarnıñ bersendä dä andıy uylar bulmağan, dide gäyeplänüçe yegetlärneñ berseneñ änise. Üzeneñ kem ikänlegen äytmäskä ütenep ul: “Bu oyışma 2003 nçe yılnıñ başında yuğarı mäxkämä tarafınnan tıyılğanlığın kem belgän soñ? Bernindi dä añlatu eşe alıp barılmağan bit. Bezneñ ullarıbız üzlären islam yulında, tuğrı yulda dip kenä uylağannar”,- dide. Tubıl şähäre imamı İbrahim xäzrät Suxov ta bu waqıyğağa ber törle genä qararğa yaramıy dide. Anıñ süzlärençä, ul oyışma tıyılğan ikän, gäyepläp bula. Ämma yegetlär küz aldında bit. Alar zıyan qılğan keşelär tügel. Taşkiewa: Min ul balalarnı jällim beläseñme. Alar araqı eçmi torğan, tämäke tartmıy torğan, bernindi yawızlıq qılmağan äle. Äytälär, qaysıları utırğan yabığışıp qalğannar, dilär. Qarayıp, yuqarıp qalğannar dilär. Miña prosto jäl alarnı. Bu svobodada yörgännäre äle, bügen ätise belän söyläştem malaynıqı, ul äytä advoqatqa 20 meñ birergä kiräk di. Başlıqların Tömänneke şuña yabırğa quşalar, di, böten närsäne. Ul yawızlıq nitkän dip. Härkemneke bit bala. Qotqarasıları kilä. Yögereşälär, aqçalar nitälär. Närsä quşsalar, şunı äytälär. Ä döresenä kitkändä bit alar ber närsä eşlämägännär. Tege pivo kütärep, araqı eçep keşelärgä yawızlıq kürsätep yörüçe malaylarğa ber närsä dä bulmıy. Minem qız şundıylar belän eşli dä, ise kitä. Ni genä eşlämäsennär alarnı proşçät itälär di. Ä monda swet obşçestwa dip äyter idem. Uqığan, belemle yäşlärebez kitälär, cibärerlär mikän. Min çın küñeldän jällim alarnı. Bu fikerne millät canlı Tubıl keşese Gölsinä Taşkiewa äytte. Mäxkämäne xäkim, yağni sud'yä Yaroslawsewa digän xanım alıp bara. Tubıllılar süzenä qarağanda, “eşne tiz tota” dilär. 15 könne başlanğan mäxkämä könneñ ikençe yartısında tuqtatıldı. Häm 24 nçe fevrälgä küçerelde. Gäyeplänüçe yegetlärneñ berse, “üzeñne gäyeple”,- dip sanıysıñmı digän sorawğa: “Min belmim. Başım awırta”,- dip cawap birde. 24 nä qädär anıñ sälamätlege tikşerelep deloğa terkälergä tieş. Mäxkämädä Mäskäwneñ xoquq saqlaw üzäge “Memorial”dan da ike keşe bar ide. Berse Tubılda sälamätlege qaqşağan yegetneñ yaqlawçısı bularaq qaldı. Nail Alan. Tömän

XS
SM
MD
LG