Accessibility links

якшәмбе, 4 декабрь 2016, Казан вакыты 05:03

Çirattağı qarşılıq çarasına äzerlänälär


Comğa könne Ufada Başqortstandağı bäysez partiälär häm ictimaği xäräkätlär, milli oyışmalarnıñ koordinatsiä şurası üzeneñ çirattağı utırışın ütkärde. Anda Başqortstan Tatar cämägätçelek oyışmaları berlege wäkilläre dä qatnaştı. Cıyında respublikada urındağı üzidärä başlıqların saylap quyu mäsäläsen kütäräçäk referendumğa äzerlek barışın tikşerü töp tem bularaq quyılğan ide. Kiñäşmädä şulay uq 26 fivral könne böten respublikta häm şul isäptän Ufada da ütäçäk qarşılıq çaralarına äzerlek mäsäläse dä söyläşüneñ üzägendä buldı. Ul qarşılıq aqsiäse älege dä bayağı, Kälimulla tayağı, digändäy taşlamalarnı aqçalata tüläwlärgä rizasızlıq belderü maqsatında oyıştırıla. Mitinglarnı oyıştıruçılar 26 fivral könne Ufada ğına da 10 meñnän kübräk keşe cıyarğa niätli. Uram cıyınnarı tağın berniçä ere şähärdä ütäçäk dip belderelde bu oçraşuda. Ufadağı cıyınnarğa xalıq ike urınğa – başqala meriäse binası qarşındağı Lenin mäydanına häm telewidenie üzäge yanıdağı mäydanğa cıyılaçaq. Şuşı urınnarda tuplanıp, zur bulmağan mitinglar ütkärgännän soñ, qarşılıq çaralarında qatnaşuçılar kümäkläp, respublika xökümäte binası yanına barırğa niätli. Anda alar üzläreneñ elekke mitinglarında da alıp çıqqan plakatların kütärep baraçaq. Şigärlär şul uq: «Ölkän yäştäge keşelärne xäyerçelekkä töşergän xökümätne otstavkağa», «Biçara aqçalarnı üzegezgä alığız, ä bezgä äwwälge taşlamalarnı kire qaytarığız» häm başqalar häm başqalar. Başqortstan citäkçelegenä yünälderelgän taläplär yañğırayaçağı da äytelde kiñäşmädä. Çığış yasawçılar 26 fivraldä ütäçäk çaralarnı oyışqan töstä, härtörle provokatsiälärgä bireşmiçä, bik täesirle uzdıru öçen üz täqdimnären dä äytte. Provokatsiälär bulırğa mömkin, dip äytelde kiñäşmädä, çönki räsmi xaqimiätlär tarafınnan aşığıç räweştä üzlären yaqlıy torğan ber xäräkät tözelgän ikän. «Beznekelär» dip atalğan ul xäräkätkä nigezdä başqort yäşläre, yuğarı uqu yortlarında belem aluçı taliplar häm sportçılar kerä, di. Alar respublika xakimiätlären yaqlap, oppozitsiä häm pensionerlar oyıştıraçaq mitinglarğa qomaçawlıq tudırırğa tieşle ikän. Şundıy şartlarda oyışqanlıqnı, uyawlıqnı saqlarğa çaqırıldı. Här partiädän, ictimaği xäräkätlär häm milli oyışmalardan üz tarafdarların cıyınğa tuplaw häm tärtip buldıru öçen cawaplı keşelär bilgelände. Qarşılıq çarasında qabul iteläçäk qararlar häm möräcägätlärneñ ölgelären dä äzerläp quydı älege utırışta qatnaşuçılar.

XS
SM
MD
LG