Accessibility links

сишәмбе, 6 декабрь 2016, Казан вакыты 17:17

Piketlar mart ayında qabat ütkäreläçäk


Başqortstan Tatar cämägätçelek oyışmaları berlege 18 fevräl könne üzeneñ utırışın ütkärde. Anda bu çärşämbedä Ufada tatar oyışmaları oyıştırğan qarşılıq çarası, piket näticäläre xaqında fiker alışu buldı. Ğomumän alğanda, respublik xökümäte yortı yanında oyıştırılğan uram cıyını uñışlı ğına ütte dip belderelde. Ämma tatar milli xäräkäte wäkilläre üzläre bu cıyınğa tuplanu öçen bilgelängän urın yanına, yağni näq Xökümät yortı qarşına uq ütkärelmäde häm bu älege çaranıñ näticäsen şaqtıy yomşarttı, älbättä. Tığız saflar bulıp tezelgän distälärçä militsiä xezmätkäre Aq yortqa baru yulların kamap alğan ide. Şulay da, Başqortstan Tatar cämägätçelek oyışmaları berlege räise urınbasarı, professor Mäcit Xucin belderüençä, bu äle qarşılıq çaralarınıñ başı ğına. «Mart ayınıñ täwge könnärennän ük şundıy uq piketlar oyıştıru yañartılaçaq, – dip äytte Mäcit äfände. – Respublika xakimiätläreneñ tatar xalqı mänfägätlärenä iğtibarın barı tik şundıy qatğıy çaralar belän genä yünältep bulır möğayın. Çönki moñarçı barlıq mäsälälärne urtağa salıp tikşerü häm xäl itü turındağı möräcägätlärne sanğa suqmadı alar». Mäcit Xucin utırışta qatnaşuçılarnıñ iğtibarın respublikanıñ räsmi matbuğat basmalarında tatar milli oyışmalarına qarşı äledän-äle yañarıp toruçı höcümnärgä dä yünältte. «Menä başqort telendä çığuçı «Başqortstan» gäziteneñ bügenge sanında da bezneñ adresqa häm citäkçebez Ramil Bignov isemenä ällä küpme pıçraq atılğan çirattağı mäqälä dönya kürgän, – dip Mäcit äfände ul yazmadan qayber özeklärne uqıp işetterde. «Başqortstan» gäziteneñ 18 favral sanında «Xäwefle uyın» isemle yazma urın alğan. Mäqälä autorı Gölşat Äxmätqujina Başqortstan tatar oyışmaları isemenä genä tügel, ä Tatarstan taraflarına, yazuçı Fäwziä Bäyrämowağa, jurnalist Mansur Mortazinğa qayber ğaye pläwlären citkerä. Autor xanım Başqortstanda tatar telenä dä däwlät tele statusı birügä dä qarşı ikän. Änä Tatarstanda tatar tele ul statusqa iä inde, şul bik citkän, dip belderä autor.

Kiñäşmädä çığış yasawçılar monıñ işe yazmalarğa xäzer inde älläni ğäcäplänmäwlären äytte. Kemnärder yaza torsın, ä bez millätkä fayda kitererlek täğayın eşlär başqarırğa tieşbez, digän näticä yasadı tatar milli xäräkäte aqtiwistları. Tatar oyışmalarınıñ çirattağı cıyını kiläse atnanıñ sişämbe könenä täğayınlände.

XS
SM
MD
LG