Accessibility links

дүшәмбе, 5 декабрь 2016, Казан вакыты 03:28

Tatar gimnaziäsendä zur kiñäş


Comğa könne Ufadağı 65 nçe sanlı tatar gimnaziäsendä bik möhim ber çara bulıp ütte. Anda «Mäğärif sistemında yaña eş alımnarı» digän proğramma nigezendä tatar tele häm ädäbiätı uqıtuçılarınıñ seminär-kiñäşmäse bulıp ütte. «Watanım» kommersiäle bulmağan xezmättäşlek oyışmasınıñ Başqortstan bülege oyıştırğan bu oçraşunıñ kön tärtibenä xäzerge zaman öçen ütä dä möhim mäsälä quyılğan. «Başqortstanda yäşäwçe tatarlarnıñ tärbiä traditsiäläre häm alarnı mäktäplärdä bügenge tärbiä protsessında faydalanu» dip atalğan eşlekle söyläşügä Ufadağı tatar gimnaziäläre häm qatnaş mäktäplärdäge tatar klassları uqıtuçılarınnan tış, respublikanıñ qayber rayonnarınnan, şulay uq Kuşnarenko rayonındağı pedağoğiä kölliätennän dä möğallimnär kilgän ide. Älege çaranıñ berençe öleşendäge «Tügäräk östäl» söyläşüendä tanılğan ğalimnär – tatar tele häm ädäbiätı belgeçläre kön üzägenä quyılğan tema buyınça üz fikerlären yañğırattı. Başqortstan däwlät universitetında häm pedağoğiä universitetında uqıtuçı filoloğiä fännäre qandidatları Musa Möleqov, Sufian Safuanov häm Räüf İdrisov Rusiädäge bügenge qatlawlı häm bolğawır şartlarda tatar balaların milli äxlaq häm ädäp traditsiälärendä tärbiäläw yünäleşläre xaqında härberse üz fikeren yañğırattı. Menä Musa Möleqovnıñ çığışınnan ber özekne tıñlıyq. (audio) Ufanıñ 65 nçe sanlı tatar gimnaziäsendä ütkän seminär-kiñäşmädä törle mäktäplärdän kilgän tuğan tel uqıtuçıları üzläre dä çığış yasadı häm balalarnı milli tärbiä traditsiäläre ruxında uqıtu häm tärbiäläw cähätennän üz fikerläre belän urtaqlaştı. Alarnıñ süzlärençä, bar tirä-yaqta bozıqlıq kiñ cäyelgän ber zamanda tatar balaların ğına borınğıdan kilgän matur ğädätlär ruxında tärbiäläw ansat eş tügel. Ämma qıyın dip kenä bu eştän baş tartu zur xata bulır ide. Çönki balalarıbıznı tieşençä tärbiäli almasaq, millätneñ dä, ğomumän, cämğiätneñ dä kiläçäge yuq. Balalarnı milli ruxta tärbiäläw cähätennän kiläçäktä maxsus metodik äsbaplar çığarunı arttıru da maqsatqa yaraşlı bulır ide, digän teläklären dä citkerde möğallimnär. Tatar gimnaziäsendäge çaranıñ ikençe öleşendä qunaqlar biredä uquçı balalar belän oçraştı häm alar äzerlägän fol'klor bäyrämne qaradı. Ğomumän, älege möhim çaradan uqıtuçılar da, ğälimnär dä qänägät qaldı. Bu seminär-kiñäşmäne oyıştırğan «Watanım» oyışması Başqortstan bülege räise, pedağoğiä uniwersitetı rektorı Rail Äsädullin monıñ işe çaralarnı törle temnarğa kiläçäktä daimi oyıştırırğa niätläre buluın citkerde. Älege köndä Başqortstanda öç tatar gimnaziäse eşläp kilä. Alarnıñ ikese Ufada, berse – Bäläbäy şähärendä urnaşqan. Yañaraq Başqortstan Tatar ictimağıy üzäge räise Ayrat Ğiniätullin ber cıyında mäğlümat öçen ber qızıqlı häm ğıybrätle san kitergän ide. «Başqortstanda äle öç tatar gimnaziäse bulsa, başqort gimnaziäläreneñ sanı xäzer 43 kä citte, – di Ayrat äfände. – Başqort balaları sanınıñ baytaqqa azraq buluın isäpkä alsañ, uyğa salırlıq san inde bu».

XS
SM
MD
LG