Accessibility links

сишәмбе, 6 декабрь 2016, Казан вакыты 17:19

Bars-Media citäkçese Marat Gäräev: Bezneñ yünäleş - tatar estradası


Tatar cırı festivale ğinwarda ütkän buluına qaramastan, anıñ turıda şaw-şu haman da bara äle. Törle matbuğat çaraları äledän äle, yılğa ber genä bula torğan bu bäyge turında, törle qaraşlı yazmalar bastıralar, kem tamaşağa eläkkän-eläkmägän, tege yäki bu cırçı nigä qatnaşmağan häm başqa şunıñ işe sorawlar gel işetelep tora. Bigräk tä jurnalistlar arasında. Küräseñ, şularğa yomğaq yasar öçen häm ğomumän inde bişençe yıl rättän uza torğan Tatar cırınıñ bıyılğısına yomğaq yasaw maqsatı belän, festival'ne oyıştıruçılar jurnalistlar öçen matbuğat konferensiäse uzdırdılar.

Tatar estradasın citäkläp baruçı lider “Bars Media” şirkäte, ä Tatar cırın oyıştıruçılar nigezdä şular, häm jurnalistlar arasında bulğan äñgämä asılda “Tatar cırı”festivale, anıñ üseşe turındağı fiker alışudan tordı. Küplär işetkänder, bıyıl “Tatar cırı” festivale yañalıqlarğa bay buldı. “Tatar radiosında” yıl däwamında barğan “Yäş yöräklär” bäygesendä ciñgän yäş başqaruçılarnı säxnägä çığaru, İlham Şakirov, Älfiä Afzalova kebek xalıq cırçılarnıñ konsertın oyıştıru, häm tamaşaçılar öçen kötelmägän yañalıq:Uqrainadan maxsus Tatar cırına kilgän tanılğan cırçısı Sofiä Rotarunıñ kilüe. Bu äle küzgä bärelep torğan yañalıqları ğına.

Qayber matbuğat çaraları ap-aq qardan qorım ezläp mataştılar anısı. Mäsälän, Tatar cırında Zäynäp Färxetdinovanıñ ni öçen qatnaşmawı. “Bars-Mediä”neñ general' direktorı Marat Gäräev bolay dip cawap birde.

Konsert öçen artistlarnıñ häm tamaşaçılarnıñ kilüe şart, şunsız konsert bula almıy. Ä Zäynäp belän Zölfät Xäkimneñ kilmäwe ul alar häm bezneñ öçen minus qına. Soñğı könne Zäynäpneñ kilmäwen añlağaç, 21 urındağı Güzäl Urazovanı kerttek.

Şulay uq, qayber jurnalistlar Marat Gäräevtan, festival'gä qayber cır avtorlarınıñ ni öçen kertelmäwlären soradılar. Marat Gäräev bolay dip belderde.

Bez alarnı çaqırırğa tieş tügel idek. Berençe yılnı bez avtorlarnı säxnägä kütärdek, alarğa diplomnar häm aqçalata premiälär birä idek, ämma avtorlar härwaqıt qänäğätsezlek işetäbez. Bu festival'dä bez barı tik populyar cırlarnı ğına bilgelibez. Zakon buyınça avtorlarğa härber konsertta yañğırağan cır öçen biş protsent gonorar küçerelä. Bez avtorlarnı asqa töşermibez, ä barı tik zakon buyınça ğına eş itäbez.

Jurnalistlar matbuğat oçraşuında sorawlar birep kenä qalmadılar, ä üz fikerlären dä äytep uzdılar. Mäsälän, jurnalist İskändär Siraci bolay dip belderde.

Sezneñ cırlardan soñ “Qara urman”nı tıñlap bulmıy. Min inde qayçan betä bu dip tıñlap utıram. Nindider ber möxärrir bulırğa tieşter bit. Şiğer belän köy arasında garmoniä yuq.

Marat Gäräev, Tatar cırı festivale oyıştıruçılar öçen aqça çığanağımı, ällä milli sänğätne üsterüme digän sorawğa bolay cawap birde.

Bezneñ yünäleş tatar estradası. Ä anıñ formaları: rok, xip-xop, disko, bard yünäleşen bez etäbez. Tatar estradası bügenge köndä bezneñ şikelle Rekords kompaniälär qulında.

Älbättä, tatar cırı turında bäxäslär yış bula. Tatar cırı bäygese oyıştıruçılarınıñ matbuğat oçraşuı , şuşı bäxäslärneñ küpçelegenä cawap birde. Çınlıqta isä, tatar estradası kütärelä häm ul zaman taläbenä, şul isäptän, aqça eşläwgä dä äylänä bara. Bu dönya standartlarınça normal' küreneş. Tatar estradasın sügep, qara kiläçäk yurawçılar da yuq tügel. Läkin, çınbarlıq başqa yaqta. Qarağız, küpme yäş cırçılar säxnägä menä tora. Dimäk, kiläçäge dä bar digän süz bu.

Gölnaz Şäyxetdinova

XS
SM
MD
LG