Accessibility links

Кайнар хәбәр

Tatarlar.ru «Yıl tatarı 2004» digän soraçtıru ütkärä


Ütkän tapşıruda tatarlar.ru portalı «Yıl tatarı» bäygesen ütkärü başlanğıçın üzenä alırğa uyladı mällä, digän soraw belän uylanğan idek. Bu atnada, elek bu bäygene ütkärep kilgän İrek Bikininnan häm şul isemdäge soraştıru ütkärä başlağan Timur Söyläymanovtan añlatmalar aldıq. Timur äfände, xatıbızğa cawap birep, Tatarlar.ru ber kemgä dä bäysez räweştä «Yıl tatarı» digän isem astında ayırm soraştıru ütkärä, dip cawap birde. «Tatarskaya gazeta» digän internet säxifäneñ baş möxärrire İrek Bikinin, da añlatmalar birde. Ul yazğança, bäyge öçen ayrım sayt yasaw, anı xakerlardan saqlap totu, tawış birüne küzätep baru häm başqalar küp waqıt taläp itä. Bu eşne eşlägän öçen, oyıştıruçılarğa räxmät äytüçelär dä siräk, şuña, İrek Bikinnıñ «yıl tatarı» bäygesen ütkärü teläge hlm waqıtı yuq. «Tatnet» tapşıruı sorawına ul şundıy cawap birde. Tatarlar.ru portalında bara torğan soraştıru bu atnada da däwam itte. Läkin tawış birelgän telägän keşegä anı tabu bik awır, çönki bu bülekkä çığu yulı täwge bittä dä kürsätelmägän, rubrikalar isemlege aşa da tabıp bulmıy. Elekke adres aşa ul säxifägä çığa aldıq, www.tatarlar.ru/new/060205.html/. Aldağı atna belän çağıştırğanda tawış birüçelär sanı 200dän 300 gä artqan. Cämilä Nizatmetdinğa birelgän tawışlar 26%-dan 20 qädär kimegän. Marat Safin 6% üsterep, ikençe urınğa çıqqan. Anıñ isäbe -19%. Fändäs Safiullin annan beraz ğına qalışa, anıñ öçen 18% tawış birelgän. Tawış birüneñ tämamlanu waqıtı kürsätelmägän. Ayırım keşelär genä belä torğan säxifägä tawış birüçelär niçek kerälär ikän? Bu sorawğa älegä cawap tabip bulmıy.



Ütkän tapşıruda, tatarça Windows turında da söyläğän idek. Bu temanı bu atnada da däwam itteräbez. Şuşı könnärdä Microsoft häm Linux programmaların tatarçalaştıru barışı turında elemtä ministrı urınbasarı Färit Fazılcanov belän söyläştek. Färit äfände birgän mäğlümatlarğa qarağanda, xäzerge waqıtta Microsoft şirkäte häm Tatarstan xökümäte arasında xezmättäşlek urnaştıru turında kileşügä qul quyuğa äzerlek bara. Anda süz älege şirkät eşläp çığarğan programmalrnı lokal’läşterü, yäğni cirle xalıqqa yaqın itü, bezneñ oçraqta, tatarçalaştıru turında da bara. Proyektnı bu yılda başlap, 8-9 ayda tämamlarğa täqdim itelä. Microsoft kebek, ikençe şirkät, Linux kompaniäse dä, üz programmaların tatarçalaştıru belän şöğellänergä riza. Microsoft belän räsmi xezmättäşlek itep, urlanğan produktsiäne qullanudan tuqtatırrğa bulır ide, di ministr urınbassarı. Belgänegezçä, Rusiädä kompyuterlarnıñ kübesendä räsmi litsenziäse bulmağan, yäğni urlanğan programmalar taralış alğan. Kiläçäktä, ministr urınbasarı äytkänçä, däwlät oyışmaları räsmi satıp alınğan Windows qına toraçaq. Tatarçalaştırılğan Microsoft programmaların Tatarstan buşlay taratırğa täqdim itä. Ä latinça tatarça, yäki kurilça tatarçanı kertäsezme, digän sorawğa, Färit Fazılcanov: «Miña barıber», dide, «Tatarstan, bu mäs’älädä nindi säyäsi qarar qabul itä, şul bula, texnik yaqtan ikese dä mömkin», - dide ul.



Bikä Timerova.

XS
SM
MD
LG