Şulay itep Azatlıq radiosınıñ 21 fevral’ – Xalıqara Ana tele könenä bağışlap ütkärgän bäygese tämamladı. Bügen bez sezne anıñ berençe näticäläre belän tanıştırabız. Äytergä kiräk, tıñlawçılarıbıznı bäyge bik qızıqsındırdı. Cawaplarnı bezgä Qazannan ğına tügel, ä Bua, Tübän Kama kebek respublikanıñ başqa töbäklärennän dä cibärdelär. Alay ğına da tügel, bäygedä qatnaşıp tärcemälärne Surgut, Sember, xätta Ukrainanıñ Dnepropetrovski şähärennän dä cibärüçelär buldı. Yäşläre, hönärläre buyınça da bezneñ bäygedä qatnaşuçılar törle. Alar arasında studentlar, uqıtuçılar, ğalimnär, jurnalistlar, pensionerlar bar. Şunısı qızıq, küpçelek tıñlawçılarıbız süzne tärcemä itep kenä qalmağan, ä alarğa täfsille añlatmalar da birgän. Filologiä belgeçe, ğalimä Döriä Ramazanova yärdämendä, bez alarnıñ barısın da qarap, tikşerep çığıp, şuşı könnärdä ciñüçelärne bilgelärbez häm sezgä citkererbez.
Ä bezneñ älege bäygene ütkärüneñ maqsatlarına kilgändä, bu xaqta Dnepropetroski şähärennän kilgän xatta bik döres äytelä. Bezneñ fikerebezçä, viktorinanıñ töp maqsat täqdim itelgän süzlärgä kiñ añlatmalar birep, misallar kiterep yazu ğına tügel. Bu ğämälneñ iñ möhime – Azatlıqnı qaysı yaqlarda tañlawnı anıqlaw, tatarlarnıñ berdämlegen, teläktäşlegen açıqlaw bulırğa tieş, dip yazalar bezgä Mäğsüm häm Zäytünä Fäsxievlar häm alarnıñ 17 yäşlek student onıqları. Alğa taba da şuşınıñ räweşendä törle ölkälärgä qarağan sorawlar, bäygelär oyıştırsağız, Azatlıqnıñ dusları, tarafdarları tağın da işäyer digän ömettä qalabız, dip östi alar. Şunısı qızıq, älege fikergä bezneñ bäygedä qatnaşuçılarnıñ barısı da diärlek quşıla. Dimäk, bez äle kiläçäktä dä tıñlawçılarıbız öçen törle qızıqlı bäygelär ütkärerbez. Ä ciñüçelärneñ isemnären häm Azatlıq radiosınıñ istälekle büläkläre turında bez sezgä yaqın aradağı tapşırularıbızda iğlan itärbez.
Gölnaz İlgizär
