Accessibility links

шимбә, 10 декабрь 2016, Казан вакыты 10:00

Ilham Şakirov isemendäge bäyge näticäläre


Uzğan şimbä-yäkşämbe könnärendä bäygeneñ öçençe turı uzdı. Bu bäygeneñ öçençe turına çığuçılar 20 dän artıq buldı. Qatnaşuçılar arasında yegetlär kübräk ide. Bäygegä qatnaşuçılar arasında hönärläre buyınça Qazannıñ iqtisad yuğarı uqu yortında uquçı da, Tatarstannıñ Spas rayonınnan traktorda eşläwçe yeget tä köç sınaştılar. Başqortstannan kilgännärdän mädäniät-sänğät ölkäsendä uquçılar kübräk ide. Mäskäwdän kilgän bik yuğarı tawış belän cırlağan Röstäm Yawaev isemle yeget tä iğtibarnı cälep itte. İnde bäyge tämamlanğan bulsa da, düşämbe kiçenä qädär laureatlarnıñ isemnäre iğlan itelmäde. Mädäniät ministrlığınıñ ministr yärdämçese Gölşat Niğmätullina bäyge turında tik üzeneñ tä''sirläre belän genä urtaqlaştı.

“Bu konkurs ikençe tapqır uzdırıla. Häm ul 1988 yıldan başlanıp cibärelgän tatar cırı konkursı däwamı bulıp bara. Qatnaşuçılar arasında tatar moñına, tatar cırına iğtibarlı bik zäwıqlı qatnaşuçılar çıqtı. Alar üzläreneñ tatar cırların başqaru sälätlären yuğarı däräcädä kürsättelär”,-dide ul.

Düşämbe könne S.Säydaşev isemendäge Zur konsertlar zalında bäygedä qatnaşuçılarnı qotladılar. Laureatlarnıñ isemnäre räsmi räweştä kiçke konsertta ğına bilgele buldı. Alar menä şundıy:

Berençe urınnı öç cırçı büleşte: İlşat Wäliev, Alsu Ziätdinova, Aygöl Sağınbayıva.

İkençe urında: Albert Wäliullin, Almaz Nurgaliev , Elwira Säläxova.

Öçençe urınğa Artur İslamov, İldus Şäydullin , Venera Nabiullina layıq tabılğan.

Bäygedä qatnaşqan Ansambl''lär arasında berençe urınnar Başqortstannan “Ömet”häm “Aqsura” häm Qazannan “Göllär” ansambllärenä birelde. İkençe urın birelmäde. Ä qalğannar diplomant buldılar. Bu konkursnıñ näticäläre turında TNV kanalınnan yäkşämbe könne tapşıru bulaçaq.

Mälikä Basıyr, Qazan

XS
SM
MD
LG