Uramdağı körtlär, buran, inde berniçä kön qar yawu Tatarstannıñ tormışına üzgäreşlär kertte. Maşinalar ber tuqtamıy yullarnı çistartıp torsa da, Qazan uramnarınnan cäyäwläp tä ütärgä qıyın buldı. Qazan Mäskäw zurlığında bulmasa da, barıber şul uq problemalarğa oçradı. Qar yawı kebek küreneşkä yul xezmätläre äzer tügel bulıp çıqtı. Cäyen, yañğır küpläp yawğanda da, maşinalarnıñ suda yözep yörüen kürergä turı kilä. Qazan 1000yıllıq bäyrämenä äzerlängän waqıtta, yul xezmätläreneñ eşläw däräcäse sorawlar tudıra. Yal könnärendä Qazan şähär yul çistartu xezmätläre tulı qüätkä eşläp tä, yullarnı düşämbegä açıp beterä almadı. «Tatar-inform» agentlığı mäğlümatlarına qarağanda, 19-20 fevral könnärendä şähärdän 6000 tonna qar tügelgän. Ğädättägeçä yul xezmätläre texnika citmäw häm anıñ iskelegenä zarlana. Yullarnı çistartu tağın 3 kön däwam itäçäk ikän.
Qar yawu arqasında şähärdä ğädättägedän kübräk yul häläkätläre bulğan. Yul xäräkäte iminlege inspeksiäse mäğlümatlarına qarağanda, 2 kön eçendä Qazanda 100dän artıq maşina bärelü oçraqları terkälgän. 2 keşe ülgän, 19zı zıyan kürgän. Yul inspektorları süzlärençä, yullardağı wazğiät kierenke bulıp qala. Däwlät gidro-metereologiä üzäge xäbär itüençä, könbatış rayonnarda, Qaybıç, Layış, Täteştä häm Çüpräledä normanıñ öçtän ike öleşe külämendä qar yawğan. Belgeçlär äytüenä qarağanda, yal könnärendä yullarda ber çaqrımlıq yul ğına açıq kürengän. Bu respublikağa kilgän könyaq-könbatış tsiklon tä’sire bulğan. Yul xezmätläre bäxetenä 22nçe fevraldän respublikada hawa torışı üzgärä baraçaq. Tatarstanğa tönyaq-atnaltik tsiklon kilä. Aldağı könnärdä qar yaw tuqtayaçaq, 18-23, xätta 32 däräcä salqın bulaçaq.
Bikä Timerova.
