Accessibility links

якшәмбе, 11 декабрь 2016, Казан вакыты 03:22

Mäçetkä säyäxät


Yartı million çaması möselman xalqı yäşi dip isäplängän Sverdlov ölkäsendä eşläp kilgän distälägän mäçetlär arasında ike bik matur mäçet bar – berse Pervoural''ski qalasında, ikençese Yuğarı Pışmada. Rusiädä iñ qüätle häm iñ zur şähärlärneñ berse bulıp sanalğan Yekaterinburg qalasında yäşäwçe möselmannarğa bu turıda älegä xıyallanırğa ğına qala.

Bu könnärdä Yekaterinburgta eşläp kilüçe Milli Media-Xolding citäkçeläre şähärneñ yıraq çitendä urnaşqan Ximmaş bistäsendä yäşäwçe möselmannar öçen Pervoural''ski mäçetenä ekskursiä oyıştırdılar. Xalıqnı alıp barıp qaytu öçen böten uñaylıqları bulğan zur, matur avtobus bilgelände. Şunısı quanıçlı, mäçetkä barırğa olı yäştäge keşelär genä tügel, yäşlär dä, balalar da teläp cıyıldılar. Barır yulda oyıştıruçılar Pervoural''ski mäçete, anıñ tözelü tarixı, mäçettä uzdırıla torğan çaralar turında söylädelär. Annan soñ üzara tanışıp aldılar. Dustanä äñgämä belän qışqı yul sizelmi dä qaldı.

Mäçet qarşında qunaqlarnı Qazıylat idäräse citäkçese Danis xäzrät Däwlätov üze qarşı aldı. Küplärneñ mäçetkä berençe kilüläre ikän. Xucalarnıñ yaqtı yöze, dustanä äñgämä qayberäwlärneñ beraz tartınuın tiz beterde. Mähabät allah yortın qarap çıqqannan soñ, Danis xäzrät qunaqlarnı zur zalğa çaqırdı. Xäzrät bu moğcizalı dönyanı yaratqan Allahı Täğäläneñ qödräte, islam dine xaqiqäte, yäş buınnı äxlaqi ruxta tärbiäläw, ata-analarnıñ häm balalarnıñ ber-berse aldındağı izge burıçı turında bik mawıqtırğıç itep äñgämä qordı. Annan soñ qunaqlarnı tämle çäy östäle yanına çaqırdılar.

Din-äxlaq, tärbiä, tuğan telne saqlaw kebek aktual'' temalarğa söyläşü kire şähärgä qaytqanda avtobusta däwam itte. Küplär üz balaların tuğan telgä öyrätep üsterä almawlarına borçılıp söylädelär. Ul ğına da tügel, tatarnıñ tatar belän üzara rusça söyläşüe dä küplärne poşındıra ikän.

Ekskursiägä baruçılar üzara yaqınraq tanışırğa, oçraşıp torırğa süz quyıştılar. Küplärne Ximmaş bistäsendä Tatarstan tapşıruların kürsätä alırlıq caylanma quyu mömkinçelege qızıqsındırdı. Şähär kabel'' televideniese anda kilep citkänçe, bälki ber oçraşu urını buldırıp, sputnik antenna quyarğadır digän fikerlär dä işetelde.

Ğomumän, Pervoural''ski mäçetenä oyıştırılğan säyäxät bik küñelle häm faydalı bulıp uzdı.

Fäwiä Safiullina, Yekaterinburg.

XS
SM
MD
LG