Accessibility links

җомга, 9 декабрь 2016, Казан вакыты 22:28

NATO citäkçese Ğiraqqa yardäm itergä çaqırdı


NATO general sekretare Jaap de Hoop Scheffer, Ğiraq xärbi köçlären äzerläwgä berlekneñ barlıq 26 äğzase dä öleş kertä, dip belderde. Summitta qatnaşqan Amerika Quşma Ştatları prezidentı George Bush, NATO wäkillären Ğiraqqa kübräk yardäm itergä çaqırdı. Fransiä häm Germaniä kebek, Ğiraq suğışına qarşı çıqqan illär Ğiraqqa instruktorlar cibärmiäçäklären äytte, ämma xärbi öyränülärne Ğiraqtan çittä oyıştırıruğa qatnaşırğa häm çaralarğa aqça bülep birergä riza buldı. Fransiä prezidentı Jacques Chirac, Fransiä bıyıl öyränü programmalarına 2 million yevro biräçäk dip xäbär itte. NATOnıñ yuğarı däräcädäge oçraşuında çığış yasağanda amerikan prezidentı George Bush, Amerika Quşma Ştatları, Yevropa Berlege illäre xärbi texnologiälären Qıtayğa tapşıra başlamasın dip borçıla, dide. "Qıtayğa qoral häm texnologiälär birep toru, Qıtay belän Taiwan arasındağı mönäsäbätlär balansın bozaçaq, digän borçılu bar bezneñ ildä" dide Bush. Amerikan prezidentı bügen Brüsseldä Fransiä häm Britaniä citäkçeläre belän Pekinğa qoral satu çikläwlären beterü turında söyläşkän. Yevropa citäkçeläre, qoral texnologiälären Qıtayğa tapşıru bulmayaçaq, bu turıda maxsus plan bar, dip belderde. Ämma Bush, Yevropa bu mäs'älädä amerikan kongressın ışandırırğa tieş, dide.

XS
SM
MD
LG