Accessibility links

чәршәмбе, 7 декабрь 2016, Казан вакыты 17:32

Yuçenko: Ukrainanıñ Yevropa Berlege äğzase buluı – töp maqsatlarnıñ berse


Ukraina prezidentı Viktor Yuçenko, Yevropa Berlege äğzase bulu – Ukraina öçen töp maqsatlarnıñ berse, dip belderde. Ukraina äğzalek turındağı söyläşülärne 2007nçe yılda başlarğa ömetlänä. Bügen Yuçenko bu xaqta Strasburgta Yevropa Parlamentı aldında äytte. Parlament prezidentı Josep Borrell, 2007 – söyläşülärne başlarğa bik irtä, Ukrainağa äle kimendä 3 yıl kiräk, dide. Bügen irtän Brüsseldä, Yuçenko, Rusiä belän yaxşı mönäsäbätlär urnaşmıyça Ukrainanıñ – Yevropa häm NATOğa yaqınayuyı mömkin bulmayaçaq, dip belderde. Yevropa Komissiäse prezidentı Jose Manuel Barroso belän irtänge aşta oçraşqannan soñ Yuçenko, Ukraina säyäsäte ber yaqqa da ziyan kitermäskä tieş, dide. "Bezneñ könçığıştağı strategik partnerıbız – Rusiä. Könbatışta – Yevropa Berlege. Könçığıştağı häm könbatıştağı xörmätle kürşelärebezgä qarata açıq säyäsät alıp barırğa telibez. Kürşe Rusiä belän mönäsäbätlärne caylamıyça häm urtaq problemalarnı xäl itmiçä, Yevropağa taba adım yasıy almayçağıbıznı min añlıym", dide Yuçenko. Düşämbe könne Yevropa Berlege häm Ukraina arasında xezmättäşlek turında kileşü qabul itelde. Anda törle ölkälärdä xezmättäşlek, şul sanda Yevropa investisiä bankınnan 327 million dollar kredit alu qaralğan. Kiçä Yuçenko şulay uq NATO utırışında qatnaştı. Ukraina, Yevropa Berlege anıñ Dönya Säwdä Oyışmasına kerü telägen xuplar häm viza çikläwlären ciñeläyter dip ömetlänä.

XS
SM
MD
LG