Tanılğan millättäşebez, kino häm teatr artistı Marat Başarov, Qazanğa kilep, soñğı könnärneñ iñ şaw-şulı premyerası «Törek gambitı» tamaşaçılarğa täqdim itü çarasında qatnaştı. Qazanıñ ber säwdä üzägendä konsert oyıştırıldı, anda Mäskäwdän kilgän rok muzıkantlar üz äsärlären başqardı. Yäşlär aldında çığış yasağanda Marat Başarov, tatar ikänen häm tuğan telen beraz belgänen kürsätergä tırıştı. Säxnägä menep ul, tatarça mäxäbbät añlatkanda «min sine söyämen» diärgä bula, min tatarça beraz beläm, dip äytte. Yäşlär añıñ bu süzlären çıqçırıp küätläde.
«Törek gambitı» digän filmda Marat keçkenä rol başqara, alay da, anıñ bu film belän bäyle istälekläre küp. Bu film aña bigrktä, töşkän waqıtta xatınnıñ islam dinen qabul itüe häm, soñınnan balanıñ tuuı belän qäderle, dip söyläde ul. «Azatlıq» xäbärçese sorawlarına cawap birep ul, änise Rawza isemle buluı, Mäskäwdäge tatar konsertlarına yörüen xäbär itte.
Marat Başarovnı Qazanda yaxşı belälär häm yaratalar bulıp çıqtı. Keşelärneñ ber tuqtamıy räsemgä töşergä sorawı Maratnı bik yalıqtırsa da, ul här möräcäğät itkän keşe belän iğtibarlı bulırğa häm tatarçalatıp «xällär niçek», dip däşärgä tırıştı. Kitär aldınnan Marat Başarov Qazanğa qabat kilergä teläwen häm Qol Şärif mäçeten bik oşatuın xäbär itte. «Törek gambitı» filmın täqdim itü çarasına biletlar 500 sum toruına qaramastan, alar 2 kön aldan satılıp betkän. Bu könnärdä Qazanda älege film barlıq kinoterlarda här kön häm säğät sayın diärlek bara.
Bikä Timerova.
