Accessibility links

шимбә, 3 декабрь 2016, Казан вакыты 07:53

Bush Bratislava çığışında Slovakiäneñ demokratiägä küçüenä mädxiä uqıdı


Yevropa säfären däwam itep Quşma Ştatlar prezidentı George Bush Slovakiägä kilde. Atnakiç Bratislava üzägendä cıyılğan meñlägän keşe aldında çığış yasap, Bush slovaklarnıñ uñışlı räweştä demokratiägä küçüläre, bar dönyağa ireklek yawlap kürsätüläre turında äytte.

Bush üzeneñ çığışın slovak telendä "Xäyerle kön" dip başladı. Brussel häm Mainztağı oçraşular tübä astında, saylap alınğan keşelär belän ütsä, Slovakiädäge çığışın ul açıq hawada, meñlägän keşe aldında yasadı. Şaqtıy salqın buluğa qaramastan Bratislavanıñ üzäk mäydanına cıyılğan meñlägän keşe, amerikan häm slovak bayraqların bolğağan yäşlär, Bush äytkännärne alqışlap qarşı aldı.

Bush slovaklarnıñ kommunizmnan demokratiägä küçüenä, bar dönyağa tınıç yul belän bäysezlekkä ireşep kürsätülärenä uqıdı. Alğa taba ul (monısı inde ğädätkä äylänep bara) 1989da Könçığış Yevropa illärendä bulğan waqiğälärne bügenge Äfğanstan häm Ğiraqtağı xällär belän çağıştırdı. Gruziä belän Ukrainada bulğan inqilaplarnı da şul uq tezmägä tezde:

Audio (George Bush)

"Soñğı waqıtlarda bez ireklek tarixında xälitkeç waqiğalarğa şahit buldıq: Gruziädä gölçäçäk inqilabı, Ukrainada äflisun inqilabı, menä xäzer Ğiraqta şämäxä inqilab (monısı saylawçı barmağına salınğan tamğa tösennän) Ğiraq xalqı tawış birep, böyek tarixın başladı. Yaña xökümät töziäçäk, konstitutsiä yazaçaq, irekle xalıq bularaq üze belän üze idarä itäçäk."

Bu ireklek axır çiktä här ilgä, här xalıqqa barıp citer digän ışanıçın äytep, amerikan prezidentı, beraz alğaraq bağıp, Moldovanı iskä aldı:

Audio (George Bush)

"Tağın 10 könnän Moldova xalqınıñ, saylawlarğa barıp, demokratiä turındağı şiklärne çitkä quyu forsatı bulaçaq."

Bush Belarusnı da telgä aldı. Bu süzlärne keçkenä Belarus bayraqları totqan keşelär törkeme ayıruça cılı qarşı aldı:

Audio (George Bush)

"Hiçşiksez, qayçandır Belarus ta demokratik illär arasına keräçäk. İreklek awazı axır çiktä här ilgä, här xalıqqa barıp citäçäk."

Amerikan prezidentı Kosovo, Ğiraq häm Äfğanstanda tınıçlıq saqlawğa öleş kertkän öçen Slovakiägä räxmäten äytte. Totalitarizmnı ciñü täcribäse bulğan slovaklarnı bu sabaqnı yäş buınnarğa tapşırırğa çaqırdı.

Ällä ni yaña fiker äytmäsä dä, Bushnıñ çığışı alqışlar belän qarşı alındı. Slovaklar, bu säfär belän Bratislava tarixqa kerep qalaçaq, dip quana.

Şunnan soñ George Bush Rusiä prezidentı Vladimir Putin belän söylöşülär başladı. Bu tapşıru äzerlängändä oçraşu äle bara ide. Anıñ näticäse xaqında Azatlıqnıñ qısqa dulqınnarında yañğırıy torğan kiçke tapşıruında tıñlıy alasız.

-Ali Gilmi
XS
SM
MD
LG