Accessibility links

якшәмбе, 11 декабрь 2016, Казан вакыты 01:19

Tufan Miñnullin: "Däwlät buludan tuqtıybız"


25 fevral’ könne respublika Däwlät Şurasınıñ çirattağı utırışı uzdı. Anıñ kön tärtibendä şaqtıy ğına sorawlar torsa da, şular arasında iğtibarnı ayıruça cälep itkäne – Tatarstan konstitutsiäne üzgärtülär kertü, respublika citäkçelegen yañaça bilgeläw turındağı sorawlar buldı. Qayberäwlär anı bu utırışta qaramasqa täqdim itsälär dä, ul kön tärtibennän töşep qalmadı. Älege mäs’älä deputatlarnıñ üzläre öçen dä bik möhim buldı, anıñ buyınça bäxäslär şaqtıy qızu bardı. Mäsälän, deputat Tufan Miñnullin älege sorawnı tikşergändä menä närsälär äytte.

Min üzemne ülem tüşägendä yatqan keşe yanında kebek xis itäm. Üzäkneñ töbäklärgä üz namestnigın quyu teläge, minemçä, saylawçılarğa ışanmawdan kilep çıqqan. Töbäklärdä saylawçılar Rusiäne tarqatırğa cıyınuçı citäkçelärne saylar, alarnı qarap torırğa üzäktän keşe kiräk, dip. Üzebezneñ prezidentnı saylağanda, bezneñ xalıq aña ışanıp, bernindi yalğanlawsız saylap quydı. Häm kiläçäktä dä, min respublika xalqına ışanam. Bälki ölkälärgä kiräkter dä ul, läkin bez bit respublika. Rusiä häm Tatarstan konstitutsiäläre buyınça bez däwlät. Niçek inde xoquqi däwlätneñ başlığın kemder bilgeläp quysın, di? Ägär dä bez bügen şuşı qanun proyektın qabul itäbez ikän, bez däwlät buludan tuqtıybız

Fiker alışu barışında İndus Tahirov ta qatnaştı. Anıñ çığışı Tufan Miñnullinnıñ kebek xisle tügel, ä, kiresençä, citdi häm dälille buldı.

Minemçä, parlament formasındağı idärägä küçärgä tieş. Läkin bu böten Rusiädä, anıñ xakimiäteneñ iñ östennän başlap eşlänergä tieş. Rusiäneñ prezidentı da şulay saylanırğa tieş. Bu oçraqta bez respublika prezidentı Rusiä prezidentı täqdime buyınça bilgelänügä qarşı çığarğa tieş

Rusiä prezidentı täqdime buyınça, respublika citäkçelegen yañaça bilgeläw kiräklegen yaqlap çığuçılar da buldı. Şaqtıy ğına fikerläşkännän soñ, deputatlar respublika konstitutsiäsenä üzgärtülärne kertergä, digän qararnı berençe uqılışta qabul ittelär. Şulay itep, Tatarstannıñ töp qanunına xäzerge prezidentnıñ wäkälätlären aldanraq beterü, yaña citäkçene bilgeläw protsedurasına qağılışlı üzgäreşlär kerteläçäk, üzäk saylaw komissiäläreneñ eşçänlege turındağı qanun da tuqtatılıp toraçaq.

Gölnaz İlgizär

XS
SM
MD
LG