Accessibility links

сишәмбе, 6 декабрь 2016, Казан вакыты 08:46

Parlament räise bulıp Konstantin Tolkaçev qaldı


Başqortstan Däwlät Cıyılışı – Qorıltaynıñ atnaqiç könne ütkän çirattağı utırışındağı ğädättän tış waqıyğalar respublik cämägätçelegeneñ iğtibar üzägendä qala. Uzğan proğrammabızda bu xaqta beraz mäğlümat birgän idek. Tıñlıy almağannar öçen şunı äytä alabız – bu utırışnıñ başında uq respublik prezidentı Mortaza Räximov çığış yasadı häm ber törkem deputatlarnıñ Başqortstanda «säyäsi fetnä» äzerlägän buluın äytte. Anıñ süzlärennän kürenüençä, respubliknıñ yağulıq-energetiqä tarmağı şirkätlären citäkläwçe parlament äğzaları Qonstantin Tolqäçev urınına spiker itep üz keşesen quyarğa telägän häm astırtın, mäkerle eş alıp barğan ikän. Läkin monda iñ aptıratqanı şul: respubliknıñ yağulıq-energetiqä tarmağı şirkätläreneñ hämmäsen dä prezidentnıñ ulı – Ural Räximov citäkli. Bu inde berkemgä dä ser tügel. Şulay bulğaç, ölkän Räximovqa keçe Räximov qarşı çıqqan, fetnä kütärergä mataşqan bulıp çığamınıy? Ämma moña respubliktağı bäysez säyäsätçelär genä tügel, ä parlamenttağı qayber üz fikerenä iä deputatlar da şiklänep häm mıyıq astınnan kölep kenä qarıy. Şular isäbennän Edward Murzin belän Gennadiy Şabayıv ta monıñ aldan yaxşılap oyıştırılğan teaträl tamaşa buluına zur şiklär bar dip belderä. Menä Edward Murzin fikerläre.

(Murzin)

Sez Başqortstan Däwlät Cıyılışı deputatı Edward Murzin fikerlären işettegez. Başqortstan parlamentındağı cäncal xäzer Rusiä üzäk mäğlümat çaralarında da kiñ yaqtırtıla. Alarnıñ da qayberläre bu waqıyğanıñ säyerlegenä basım yasıy. Mäskäw Kremle aldında üzeneñ abruyın kütärü öçen, respublik prezidentı tarafınnan oyıştırılğan spektäkl bu, dip belderüçelär baytaq. «Yejenedelnıy jurnal» basması xäbärçese Yüliä Latınıyna isä üz näticälärendä tağın da yırağraq kitä. «YuQOS»qa qanıqqançı, Kremlgä Başqortstannıñ «Başneft» şirkäten nıqlap tikşerü xäyerleräk bulır ide, – dip belderä autor. – Başqortstan neftenä moñarçı prezident Räximovnıñ ulı Ural xuca buldı häm anıñ baylığı däwlät qaramağınnan yuq buldı». Latınıyna bilgeläwençä, Başqortstan parlamentı bu atnaqiçtä çınlap ta Tolqäçev urınına spiker itep Ural Räximovnı täğayınlärgä cıyınğan bulğan. Ämma bu xaqta Mäskäw Kremlendä belep qalğaç, ölkän Räximov belän citdi söyläşep alğannar. Menä şunnan soñ inde Mortaza Räximov nindider fetnä xaqında möräcägät yasarğa mäcbür bulğan», – dip yaza Yüliä Latınıyna. Şulay itep, älege tomanlı cäncal xaqında törle fikerlär äytelä. Anıñ xaqında çın döreslek bälki tiz genä açıqlanmas ta äle. Çönki prezidentnıñ matbuğat süzçese Rostislaw Morzağulov jurnalistlar belän parlament utırışınnan soñ oçraşqaç:«Mortaza Räximov ta, spiker Qonstantin Tolqäçev ta üz wazıyfaların 2008 yılğa qädär başqaraçaq. Menä şunıñ belän noqta», – dip kisterep äytte.

XS
SM
MD
LG