Accessibility links

шимбә, 3 декабрь 2016, Казан вакыты 05:38

Kamal teatrı Ufada soñğı tamaşaların kürsätä


Elegräk tä xäbär itüebezçä, Ufada Ğäliäsğar Kamal isemendäge Tatar däwlät aqädemiä drama teatrınıñ ğastrol'läre bara. Başqortstannıñ Rus däwlät aqädemiä drama teatrı binasında ütüçe tamaşalarğa här könne xalıq küp yöri, zallar şığrım tulı bula. Läkin ni ükeneç, Qazan artistları alıp kilgän matur bäyräm tämamlanuğa taba bara. Kamallılar Ufadağı ğastrol'lären 28 fevräl könne «Qazan sölgese» tamaşası belän tämamlıy. Teatrnıñ baş administratorı İnsaf Xämitov äytüençä, älege säxnädä çığış yasaw kamallılarğa bik tä oşağan. Aldağı kilülärendä dä artistlar şuşında çığış yasarğa teläwlären äytkän. Bu möğayın da şulay bulır da, çönki Başqortstannıñ Rus aqädemiä drama teatrı baş rejisserı Mixäil Rabinowiç ta moña biş qullap riza ikän. «Almaş ğastrol'lär oyıştıru ike yaq öçen dä otışlı buluı bügennän ük kürenep tora, – dip äytä ul. – Kamal teatrın Ufada, ä bezneñ teatrnı Qazanda yaxşı qabul ittelär», – di Rabinowiç äfände.

Kamallılar Ufada ğına çığış yasap qalmıy, ä qayber rayonnarğa barıp ta teatr sänğäten söyüçelärne quandırdı. Uzğan könnärdä teatrnıñ ayırım törkemnäre Çişmä häm Büzdäk rayonnarında da üz spektäkllären täqdim itte. Bu töbäklärdä teatrnıñ «Kiçer mine, änkäy» trağiqomediäsen qaradılar.

Kamallılar Ufadağı ğastrol'läre barışında spektäkllär quyıp qına qalmıy, ä törle radio häm telewidenie qanallarına bixisäp äñgämälär dä birde, tatar häm başqort cämägätçelege, şulay uq «Nur» tatar däwlät teatrı artistları belän qızıqlı oçraşular da oyıştırdı. Mäğlüm buluınça, Qazanda «Nur» teatrına qaytaçaq unğa yaqın yäş artist talip uqıy. Alarnıñ berniçäse Ufadağı ğastrol'lärdä berençe çınığunı aldı da inde.

Fänis Fätxi, Ufa.

XS
SM
MD
LG