Omski ölkäseneñ iñ tönyağında urnaşqan, xalqınıñ 13%-tan artığın tatarlar täşkil itkän Ust'-İşem rayon üzägendä yaña mäçet açıldı. Comğa könne bu allah yortın açu tantanası bulıp uzdı. Äytergä kiräk, rayon üzägendä yäşäwçe möselmannar moña qädär dä bötenläy mäçetsez bulmadılar. Ust'-İşemdä alar xacätenä birelgän bina bar ide. Ämma qayçandır qunaqxanä bulğan ike qatlı yortnıñ berençe qatı möselmannar öçen gıbädätxanä bulsa, ikençe qatı tulay toraq bulıp xezmät itte. Bu xäl älbättä möselmannarnı borçıdı häm alar küptännän üz mäçetlärendä ğibädät qılu turında xıyallandılar. Häm nihayät uzğan yılnıñ başında Ust'-İşemneñ üzäk ber uramında urın birelep, mäçet tözeleşe başlandı. Tözeleşneñ töp ximyäçese “Yenisey” şirkäte general' direktorı Tamir äfände Älimbaev buldı. Seber yağı möselmannarı möftiäteneñ, rayon xakimiäteneñ häm rayon xalqınıñ da yärdäme küp buldı. Ğomum köçlär belän mäçet ber yıl digändä tözelep tä bette.
Mäçet açu tantanasına kilgändä, anda Seber yağı möselmannarı möftie Zölqarnäy xäzrät Şakircanov, rayon başlığı Sergey Sergeev, qayber awıl mäçetläre mullaları, rayon häm kürşe-tirä awıllar möselmannarı qatnaştı. Ölkä üzägennän dä qunaqlar buldı. 600 çaqrım yıraqlıqtağı Ust'-İşemgä barırğa transport belän alarnı Tamir äfände Älimbaev tä'min itte.
Tantananı möfti Zölqarnäy xäzrät Şakircanov açıp cibärde. Ust'-İşem möselmannarın mäçetle buluları belän täbrikläp, tözeleştä qul köçe belän, aqçalata, yärdäm kürsätüçelärgä räxmätlären beldergännän soñ ul yaña mäçetkä, töp ximyäçe bulğan Tamir äfändeneñ ätise isemen birergä digän täqdim yasadı.
Xalıq bu täqdimne bertawıştan xuplap qabul itte. Tamir äfände märxüm ätisenä şundıy xörmät kürsätkännäre öçen räxmätle buluın belderde. Annan soñ ul “Minem alda mäçet tözeleşenä yärdäm itärgäme – yuqmı digän soraw tormadı. Min barı tik mäçet buş tormasmı dip kenä borçıldım”, - dide.
Östäp şunı da äytergä kiräk, mäçet açu tantanasına qunaqlar buş qul belän belän kilmägännär ide. Küplär kelämnär, şamaillär, dini kitaplar büläk ittelär. Rayon xakimiäte başlığı Sergey Sergeewnıñ büläge üzençälekle buldı. Ul mäçetneñ kommunal' toraq xezmäte çığımnarın rayon byudjetı isäbennän tüläw mäsäläsen xäl itärgä wäğdä itte.
Şulay itep, Omski ölkäsendä tağı ber mäçet eşli başladı. Şunsı uylandıra, qayber awıllardağı mäçetlär kebek, ul buş tormasmı? Döres, tantanada bulğan xalıq mäçetneñ buş tormayaçağına ışana.
Rozaliä Sayganova, Omski.
