Mäğlüm bulğança bäygeneñ berençe turında Omskidan 7 cırçı köç sınağan ide. İkençe turğa märtäbäle jyuri tarafınnan 1 genä cırçı – 17 yäşlek Röstäm Äxmetçanov qına saylanıp alındı. Ämma, Ural, Seber töbäklärennän qatnaşqan qayber başqa cırçılar kebek, Röstäm bäygeneñ 3 nçe turına ütä almadı. Şulay da bäygeneñ yomğaqlaw häm büläkläw konsertlarına qalıp, ul çärşämbe könne genä Omskiğa äylänep qayttı. Uñışqa ireşä almasa da, Röstäm üzeneñ mondıy däräcäle bäygedä qatnaşuınnan qänäğät. “Bu minem öçen zur imtixan häm öyränü mäktäbe buldı”, – di ul. Konkursnı oyıştıruçılarğa, jyuri äğzälärenä, Qazanda bulğan waqıtta yärdäm qulı suzuçılarğa Röstäm räxmätle buluın belderä
Şunı da äytergä kiräk, Röstämneñ maxsus muzıkal' beleme yuq. Ul “Xoquq häm eşmäkärlek” kölliätendä uqi. Kölliättä oyıştırılğan konsertlarda häm kiçälärdä yış qatnaşa. Qağidä bularaq här konsertta tatar cırların da başqara.
Röstäm tatar cırları östendä eşläwen däwam itärgä niätli. Bäygelärdä qatnaşu teläge dä añarda sürelmägän. “Miña başqaru ostalığın äle küp şomartırğa kiräk”, - di ul.
Saniä Mirxaleewa. Omski
