Bu könnärdä Sverdlov ölkäsendä islam dine öyränü buyınça Qazıylat idäräse tarafınnan oyıştırılğan “İslamda yäş belgeçlär” dip atalğan olimpiadanıñ ikençe turı ütä.
Olimpiadanıñ berençe turı tatar awılları buylap ğinwar ayında uzdırılğan ide. Maxsus raslanğan nigezlämä buyınça bu bäygedä 10 yäştän alıp 14 yäşkä qädär bulğan balalar qatnaşa ala. Yäş buyınça mondıy çikläw bu çaranı yuqqa çığarmağayı dip şiklänüçelär bulsa da, bu şik aqlanmadı. Ölkäneñ şähärläre häm rayon üzäklärendä olimpiadanıñ ikençe turı bik yaxşı däräcädä oyıştırıldı.
Qazıylat idäräseneñ üzäge bulğan Pervoural''ski mäçetenä şähär olimpiadasında qatnaşu öçen yegerme ber bala kilgän ide. Qatnaşuçılar öçen äzerlängän biremnär, bezneñ qaraşqa, bik ciñeldän tügel. Bez Qazıylat idäräse citäkçese Danis xäzrät Däwlätovtan balalarnıñ bu çarağa niçek äzerlänüe turında soradıq.
–“Här bala üzlegennän äzerlänä, - dide ul, - aña bulışır öçen bu temalarğa bezdä kitaplar, audio häm videomateriallar bar. Alarnıñ barısın da biräbez balalarğa. Monnan tış mäçetlärdä, ğibädät yortlarında balalar öçen konsul''tatsiä, kiñäşü könnäre oyıştırdıq. Alar xäzrätlärgä üzlären qızıqsındırğan sorawlarnı birep, tulı mäğlümat alalar”.
Bäyge uzdırılğan zur, yaqtı bülmädä, tantanalı tınlıq eçendä bik birelep, sorawlarğa cawap yazıp utırğan balalar arasınnan 10-12 yäşlär tiräsendäge ber malaynı saylap aldıq. Salawat isemle bu malay, bezneñ ğäcäplänüebezgä qarşı, tatarça da yarıysı ğına suqalıy bulıp çıqtı. Salawat bezgä olimpiadağa niçek itep äzerlänüe turında söyläde. –“Min kitaplar uqıdım, Gabderäxim xäzrät belän söyläşep, anıñ belän bergä äzerländem, - dide ul, - öydä qartätiem bulıştı”.
Balalardan da bigräk dulqınlanıp utırğan äti-änilär yanına kilep, alar belän äñgämä qorıp aldıq.
İslam dinen uqıtu mäktäp programmasına kermi. Mondıy olimpiada Sverdlov ölkäsendä berençe tapqır uzdırıla. Balalar öçen östämä yök tügelme ikän bu, faydası barmı ikän mondıy çaralarnıñ, kiräkme ikän alar digän sorawğa, ber-bersen bülderä-bülderä diärlek änilär bolay dip cawap birdelär: - “Älbättä, bu bik kiräk eş, - dieştelär alar, - balalar imanlı, tärtiple bulıp üssennär, üzläre dä şundıy balalar üstersennär öçen, äxlaq nigezlären belsennär öçen bik kiräk. Balalarnı dingä tartu öçen mondıy olimpiadalarnıñ yärdäme zur, yarış, bäyge, ciñügä omtılış alarnı qızıqsındırırğa yärdäm itä”.
Sverdlov ölkäsendä islam dine buyınça oyıştırılğan olimpiadanıñ öçençe turı mart axırında uzdırılaçaq. Biredä här şähärdän häm rayonnan ciñgän berär keşe qatnaşaçaq. Ölkä olimpiadasında ciñäçäk berdänber layıqlı balanı Danis xäzrät meñyäşär Qazannı qarap qaytırğa cibärergä xıyallana.
Fäwiä Safiullina, Yekaterinburg.
