Accessibility links

Кайнар хәбәр

Qırğızstan saylawları: namzätlär arasında prezident Akaevnıñ qızı häm ulı bar


75 urınlı parlamentqa namzätlär arasında prezident Askar Akaevnıñ tuğannarı buluı, oppozitsiä wäkilläre häm bäysez küzätüçelärdä küp şiqäyätlär tudırdı. Bügen bezneñ Bişkäktäge xäbärçebez universtitet binasında urnaşqan tawış birü urınına barıp kilde. Prezidentnıñ qızı, Bermet Akaeva näq şul okruğtan saylana. Ulı Aidar Akaev – başqasınnan.

Xäbärçebez äytüençä, saylaw räsmiläre bu yulı ber yañalıq qullanğan, tawış birgän här keşeneñ barmağına sörtelmi torğan tamğa salına. Bülletennär töşerelgän tartmalar ütä kürenmäle itep yasalğan. Räsmilär äytüençä, Bermet Akaeva namzäten şuşı universitet sudentları täqdim itkän. Qayber küzätüçelär häm ata-analar isä monı studentlardan mäcbüri eşlättelär di. Azatlıqqa birgän äñgämäsendä, Bermet Akaeva üze häm Aidar tiräsendäge bu süzlärne kire qaqtı:

Audio (Bermet Akaeva)

"Bez demokartik yul belän barabız. Prezident bezne ministr itep tä, gubernator itep tä quymadı. Bez açıq räweştä köräşäbez. Xalıq üze qarar itsen."

Şulay da, bezneñ xäbärçebez ike universitet xezmätkäreneñ studentlarnı saylawlarğa quıp yörüenä şahit bulğan. Alarnıñ ikese dä interview birüdän baş tartqan.

Studentlar, niçek tawış birergä kürsätmä buldımı digän sorawğa cawaptan totılıp qalğan. Söyläşergä riza bulğannarı tawışın Bermet Akaevağa birgänen äytkän, läkin ni öçen ikänen añlata almağan. İsemen äytergä telämägän bu qız, ul bezgä yaxşı kiläçäk wäğdä itte di:

Audio

Bu yeget isä şul uq sorawğa, qawşap qalıp, minem mäğlümätem az di:

Audio

Studentlarnıñ bu ikelänüen ber qıznıñ änise bolay añlattı:

Audio

"Studentlarğa uqıtuçılar, citäkçelek yağınnan basım buldı. Alar qänäğät tügel, çönki Bermettän başqa namzätlärne belmilär. Qayberläre universitettan quıludan qurqa. Bermet öçen tawış birmäsägez, quılasız digän kisätülär bulğan."

Qırğız oppozitsiäse, prezident Akaev üktäberdä ikençe möddäte çıqqannan soñ da xakimiättä qalırğa tırışa, yä konsititusiäne üzgärergä, kiñräk wäqälätle premier bulırğa mömkin, dip borçıla. Bügez üz tawışın birgännän soñ Akaev bu ğäyepläwlärne kire qaqtı:

Audio (Askar Akaev)

"Çınlap ta mondıy ğäybätlär kiñ taralğan. Oppozitsiä dä, çit il belgeçläre dä, Akaev, tağın berniçä yılğa qalu öçen konstitutsiägä üzgäreşlär kerter, di. Tağın ber tapqır açıqtan-açıq äytäsem kilä, şäxsän minem konstitutsiägä ber üzgäreş kertü niätem dä yuq."

Üzäk saylaw komissiäse, tawış birü urınnarı yabıluğa 4 säğägät qala, qatnaşu däräcäse 40 protsentqa citte, älegä citdi tärtip bozular turında xäbär itelmi, dide.

Ämmä oppozitsiä tärtip bozular bar di. Watan xäräkäte citäkçese Roza Otunbaeva, Azatlıqqa birgän äñgämäsendä, oppozitsiäneñ berniçä internet säxifäse yabıluı häm gäzit taratuğa kirtälär quyılu turında xäbär itte. Bu saylawlarda xärämläşülär bulsa, il-küläm qarşılıq çaraları başlanırğa mömkin dide ul.

-Ali Gilmi
XS
SM
MD
LG