Accessibility links

шимбә, 10 декабрь 2016, Казан вакыты 00:29

OSCE: Tacıqstan saylawları xalıqara taläplärgä cawap birmäde


Yäkşämbedä Tacıqstanda ütkän parlament saylawlarında saylawçılarnıñ 88 protsentı qatnaşqan dip xäbär itelä. Xalıqara küzätüçelär äytüençä, bu yulı saylawlar, 5 yıl elek belän çağıştırğanda, yaxşıraq ütsä dä, demokratiä taläplärenä turı kilep betmägän. Ciñüne aldan kötelgänçä, xakimiättäge xalıq-demokratik partiäse yawlağan.

Düşämbedä Tacıqstan başqalası Düşämbedä Yevropada iminlek häm xezmättäşlek oyışmasınıñ küzätüçelär törkeme başlığı Peter Eicher yäkşämbedä ütkän saylawlarğa mondıy bäyä birde:

Audio (Peter Eicher)

"27 Fivraldä Tacıqstanda ütkän saylawlar Yevropada iminlek häm xezmättäşlek oyışmasınıñ küp kenä töp taläplärenä häm dä başqa xalıqara standartlarğa cawap birmäde. Elekke saylawlar belän çağıştırğanda uñay yaqqa qayber üzgäreşlär bulsa da, bik küp tärtip bozular küzätelde."

Eicher şularnıñ berniçäsen sanap kürsätte: oppozitsiä wäkilläre cirle saylaw komissiäläreneñ barısına da kertelmägän, ä menä xakimiätttäge partiä äğzaları, kiresençä, bu komissiälärneñ başına utırtılğan. Eicher süzlärençä, mondıy xäl saylaw näticälärenä ışanıçsızlıq tudıra. Saylaw-aldı kampaniäse ğomümän räsmilär kontrole astında bardı, di ul.

Ä menä BDB küzätüçeläre şul uq saylawlarnı başqaçaraq kürgän. Berdämlekneñ başqarma sekretare Vladimir Ruşaylo saylawlarnı irekle häm ğädel dip atamasa da, alarğa cılıraq bäyä birde:

Audio (Vladimir Ruşaylo)

"Xalıqara häm cirle küzätçelärneñ buluı, saylawlarnıñ açıq ütüe Tacıqstan xakimiätläreneñ irekle häm demokratik saylawlar ütkärü tırışlığın kürsätä."

Oppozitsiä citäkçeläre isä Ruşaylo tügel, Eicher belän kileşä. Sotsial-demokratlar partiäse citäkçese Rahmatullo Zoirov şiqäyätlären yäkşämbedä ük belderde:

Audio (Rahmatullo Zoirov)

"Bezneñ wäkillär saylaw tärtibe bozılu turında küp şiqäyätlär aldı. Min bu saylawlar 2000 yıl belän çağıştırğanda ğädelräk bulır dip ömetlängän idem, läkin tärtip bozular tağı da kübräk buldı. Äytik, başqalanıñ Sino okruğında komissiä başlığı bületennär taratqanda, kem öçen tawış birergä kirägen öyrätep torğan."

Düşämbedä oppozitsiädäge 4 partiä küp sanlı tärtip bozular turında äytep, saylaw näticälären ğämäldän çığarırğa çaqırğan möräcäğät imzaladı.

Üzäk saylaw komissiäse, tawış birüdä saylawçılarnıñ 88 protsentı qatnaşqan dip xäbär itte. Peter Eicher mondıy san mömkin tügel di.

Komissiä räise Mirzoali Boltuev süzlärençä, mäcleskä älegä 3 partiä ütkän: xakimiättäge xalıq-demokratik partiäse, İslam Yañarış partiäse häm kommunistlar. Prezident İmomali Raxmonovnıñ xalıq-demokratik partiäse tawışlarnıñ 80 protsentın cıyğan dielä.

Tacıqstan Mäclesendä barlığı 63 urın. Şularnıñ 41e ber mandatlı okruglardan saylana. Qalğan 22se - 5 protsent kirtäne ütä alğan partiälär arasında, alğan tawışlarına qarap bülenä.

-Ali Gilmi
XS
SM
MD
LG