Süriä prezidentı Bäşär äl-Assad Rimda urnaşqan La Repubblica gazetına interviewda Quşma Ştatlar axır çiktä Süriägä qarşı xärbi köç qullanırğa mömkin dip isäpläwen belderde.
Anıñ äytüençä, ul üz ilenä höcümmömkinlegen Ğiraqnı ğäskärlär basıp alğannan soñ kürgän.
Assad höcüm qotılğısız dip isäplämäwe turında äytä. Ämma ul Aq Yortnıñ belderüläre Ğiraq suğışı aldınnan bulğan belderülärgä oxşağan dide.
Livannıñ elekke premyer ministrı Rafiq Xäriri üterelgännän soñ Waşington Süriägä diplomatik basımnı arttıra bara. Livanda Süriä yaqlı xökümätkä qarşılarnıñ kübese Xäriri üleme öçen Süriäne ğäyepli. Süriä bu ğäyepläwlärne kire qağa.
Assad Xäririne üterü Süriä öçen säyäsi intixar bulır ide dide.
AQŞ Süriädän Livandağı ğäskärlären çığarunı taläp itä. Bügen Bäyrüttä demonstratsiäçelär Livan xökümäten cigenergä, Süriäne üz soldatların Livannan çığarırğa çaqırdı.
