Accessibility links

пәнҗешәмбе, 8 декабрь 2016, Казан вакыты 17:15

Berezovskiy mäçetenä kömeş ay quyıldı


Bu könnärdä Sverdlov ölkäse Berezovskiy şähäre möselmannarı tormışında istälekle waqiğa bulıp uzdı – şähärdä tözelep kilgän yaña mäçet manarasına ay quyıldı. Bu waqiğanıñ şähär öçen tarixi bulğanlığın assızıqlap, Berezovskiy tatarlarınıñ milli mädäni avtonomiäse citäkçese Frida xanım Nasretdinova bolay dide: -“Berezovskiy şähärenä inde 250 yäştän dä artıq, ämma moña qädär bezneñ äle manaralı mäçetebez bulğanı yuq ide. Bu bezneñ öçen bik dulqınlandırğıç, şähär öçen tarixi waqiğa”.

Berezovskiyda tatar häm başqort xalqı bik küp yäşi. Üzläre şayarıp äytkänçä, uramda oçrağan här ike keşeneñ berse tatarça añlıy yä söyläşä. Bez Frida xanımnan şähärdäge möselmannarnıñ tormışı turında soradıq.

Berezovskiy şähäre möselmannarı 90nçı yıllar urtasında üzlärenä mäxällä tözegännär. Mäxällä idäräsenä xalıq tuğız keşe saylap quyğan. Ğibädät qılu yortı buldıru öçen ayırım ber bina arendağa alınğan.

Bügenge köndä comğa namazları häm dini bäyrämnär şunda uzdırıla. Mäxällä idäräse räise Rinat Möxämmätov, idärä äğzaları belän bergä, şähärdä dini eşlärne cayğa salu buyınça bik küp eşlär başqara. Yal könnärendä din sabaqları uqıtu oyıştırılğan, dini kitaplar häm başqa kiräk-yaraqlarnı satu öçen keçkenä genä kibetläre dä bar.

2000nçe yıldan başlap yaña mäçet tözü öçen bik uñaylı cirdän urın alırğa ireşkännär, proyekt tözelgän. 2002nçe yılnıñ sentäberendä yaña mäçet nigezenä berençe taş salınğan. Bügenge köndä mäçetneñ inde eçke yağın bizäw eşläre genä qalıp kilä. Şähär başlığı häm ere predpriätielär citäkçeläre mäçet tözeleşenä häryaqlap yärdäm kürsätep toralar. Färit Näbiullin isemle tatar eşmäkäre häm tağın yegerme bişläp xälleräk millättäşlärebez başqa çığımnarnı üz öslärenä kütärergä tırışalar. Kümäk köç belän cäygä qәdәr mäçetne safqa kertergä uylıylar.

Manarağa ay quyu tantanasına xalıq bik küp bulıp cıyılğan ide. Berezovskiy şähäre başlığı, imamnar, tözeleştä qatnaşqan barça keşelär häm ğadi möselmannar, täğbir tawışı astında kömeş aynı manarağa mengerü mizgelen bik dulqınlanıp küzättelär.

Annan soñ şähär başlığı Brozovskiy äfände cıyılğan xalıqnı bu tantana belän täbrik itte. Yaqın-tirä şähärlärdän kilgän imam xäzrätlär xalıqqa wäğäz uqıdılar. Mäçet tözeleşeneñ iñ berençe könnärennän başlap prorab wazifasın ütägän Ädip äfände Sitdiqov bu könneñ mäğnäsen bolay dip añlattı: —“Moña qädär bu ber bina ğına ide, ä bügenge könnän soñ ul mäçetkä äwerelde. Bez mäçetebezne, cıyılışta bik ozaq kiñäşkännän soñ, “Altın mäçet” dip atarğa buldıq. Här möselman keşese öçen altın kebek iñ qäderle urın bulırğa tieş bu”.

“Altın” mäçetneñ yaña ayı şähär östenä kömeş nurların sibep, iman nurın börkep torır. Berezovskiy şähäre möselmannarınıñ moña imanı kamil.

Fäwiä Safiullina.

Yekaterinburg.

XS
SM
MD
LG