Accessibility links

пәнҗешәмбе, 8 декабрь 2016, Казан вакыты 19:16

Tatar ictimaği üzägeneñ niçä qorıltayı bulır?


Soñğı aralarda respublikanıñ milli oyışmaları şaqtıy aktiv eşli başladı. Şuşı könnärdä genä, mäsälän, Qazanda Milli Şura dip atalğan koordinatsion üzäk tözelde. Milli Şuranı Tatar ictimaği üzäge, Bötentatar Mäğärif komitetı, Möselman xatın-qızları, Möselman tabipları berlekläre, İdel-Ural, Latin frontı ictimaği xäräkätläre, Mäxällä oyışması wäkilläre buldırdı. Oyıştıruçılar fikerençä, Şuranıñ maqsatları – milli xäräkätneñ töp yünäleşen bergäläp alıp baru, oyışmalarnıñ üz eçendä häm üzara möğälämä itüdä kilep tuğan mäs’älälärne bergäläp xäl itü. Anıñ här oyışmadan 3 keşe sanında idäräse dä saylandı. Älege milli koordinatsion üzäkneñ berençe utırışında ağımdağı milli eşlär turında süz bardı, Tatar ictimaği üzägeneñ qorıltayın oyıştıru xaqında söyläşende. Şulay uq anda Milli Şura cıyılışında qatnaşqan oyışmalar citäkçeläre imzalağan barlıq milli tatar oyışmalarına möräcäğät tä qabul itelde. Anda menä nindi yullar bar.

Tarixıbızğa küz salsaq, şul kürenä: däwlätebez cimerelüe dä, meñär yıllıq mädäniätebezneñ dönya sivilizatsiäse belän çağıştırğanda şaqtıy möşkel xäldä qaluı da, iñ berençe näwbättän, xalqıbıznıñ qälbenä kerep urnaşqan berläşä almaw, könçelek, berqatlılıq, üz yazmışına bitaraflıq kebek sıyfatlarnıñ buluınnan kilä. Soñğı yıllardağı milli azatlıq köräşe barışında bu açıq kürende. Soñğı aralarda xalıq köräşen oyıştıru öçen barlıqqa kilgän milli oyışmalarıbız aldında qarşılıqlar tuu, uqmaşıp eşli almaw sizelä. Bolar barısı da milli xäräkätebezne tarqatuğa alıp bara. Milli xäräkättäge bu xalättän çığunıñ ber genä yulı bar. Ul – barlıq milli oyışmalarnıñ bergälegen oyıştıru häm bu yämsez sıyfatıbızğa häm xilaf ğämällärgä qarşı berdäm köräş açu, dip äytelä Milli Şuranıñ möräcäğätendä. Bezneñ töp maqsat, tatar xalqın millät, ä Tatarstannı respublika bularaq saqlap qalu, dip belderä Şura wäkilläre.

Şulay uq Milli Şura utırışında tanılğan millättäşebez, Amerikada yäşäwçe ğalim Vil Mirzayanovqa xat ta yullarğa buldılar. Xatta bilgele ğalimne tuğan köne belän qotlıylar, isänlek, sawlıq, uñışlar häm bäxet telilär. Kürenekle ğalim häm cämäğät eşleklese Vil Mirzayanovnıñ 70 yıllıq yubileyı uñayınnan Milli Şura 4 mart könne Qazannıñ Ğabdulla Tuqay muzeyında aña bağışlanğan kiçä uzdıraçaq.

Şulay uq Azatlıq radiosına 11-12 martta uzaçaq VIII Bötentatar ictimaği üzägeneñ qorıltayına da çaqıru kilde. Oyıştıruçılar fikerençä, anda Tatar ictimaği üzägeneñ xäzerge xäle, kiläçäkkä plannarı tikşereläçäk, şulay uq milli problemalar, respublikanıñ konstitutsiäsenä üzgäreşlär kertü, Rusiädäge xakimiät vertikalen nığıtu häm başqa mäs’älälär turında fiker alışu kötelä. Älege çaqıru belän bergä kilgän möräcäğättä isä, qorıltaynı oyıştıru komitetı Tatar ictimaği üzägeneñ ber genä qorıltayın ütkärep, anda al’ternativ nigezdä üzäkneñ räisen saylarğa täqdim itä.

Şulay itep, respublikanıñ barlıq milli oyışmaları da berläşügä, berdäm eşçänlekkä çaqıra. Läkin alarnıñ möräcäğätläre Bötentatar ictimaği üzägeneñ yañadan berdäm oyışmağa äylänüenä kiterä alırmı? Monı inde yaqın kiläçäk kürsäter.

Gölnaz İlgizär

XS
SM
MD
LG