Accessibility links

дүшәмбе, 5 декабрь 2016, Казан вакыты 01:28

«Azatlıq» radiosı ozın dulqında yañğıramayaçaq


Soñğı 7-8 yıl däwamında qısqa dulqınnarda eşläwçe “Azatlıq” radiosı ozın dulqınlı Tatarstan däwlät radiosı aşa retranslyatsiälänä. Bu “Azatlıq” radiosın respublika rayonnarında, şähärlärdä häm kürşe ölkälärdä tıñlarğa mömkinlek birä. Bu atna başında Tatarstan tele-radio kompaniäse citäkçese Ayrat Sibğätulinnan “Azatlıq” radiosına xat kilde. Anda “İrekle Awropa- Azatlıq radiosı korporatsiäse” häm Tatarstan tele- radio kompaniäse arasında 1997 yılnıñ 1 avgustında tözelgän kontraktnı özü turında äytelgän. Säbäbe Tatarstan tele-radio kompaniäsen yabu turında färman çığu häm bu kompaniäne bötenrusiä tele- radio kompaniäseneñ filialına äyländerü. “Azatlıq” radiosın ozın dulqınnarda retranslyatsiälänüeñ yabıluı küptän kötelgän häm xoquqi yaqtan nigezle ğämäl bulsa da, şaqtıy küñelsez häm ähämiätle waqiğa, çönki soñğı yıllarda meñnärçä tıñlawçılar awıl yortlarında, şähär fatirlarındağı aş kuxnyalarında elenep torğan çıbıqlı radio aşa täwlege 5-6 säğät däwamında Tatarstan radio taptıruların häm ber säğät buyı “Azatlıq” radiosın tıñladılar. Bu salqın suğış yıllarındağı säyäsi qarşılıqlardan soñ tawış sündergeç belän tomalanğan “Azatlıq”nıñ irekkä çığuı, härkemgä barıp citüe üzgärtep qorunıñ häm demokratiäneñ ber cimeşe buldı.

Şuşı retranslyatsiä yärdämendä bik küp keşelär “Azatlıq” radiosınıñ doşmanlıq yäki kierenkelek kiterüçe säyäsi qoral tügel, ä süz irege, ğomumi täräqqıätne, millätlär häm keşe xoquqların yaqlawçı faydalı mäğlümat çarası buluına inandılar. “Azatlıq” Tatarstanğa häm İdelgä kiterügä häm Tatarstan teleradiokompaniäsen häm Tatarstan radiosın törle yıllardağı citäkçeläre İlgiz Xäyrullin, Täyfıq Säğıytov, Minwäğıyz Zäynetdinov, alda äytelgän mäğlüm kontraktnı imzalağan Räis Töxvätullin, “Azatlıq” radiosınıñ Tatar-başqort redaksiäseneñ mödire häm başqa bik küplär zur öleş kertte. Däwlätlär, xalıqlar arasındağı qoymalarnı awdaru, çiklärne açu, doşmanlıq urınına duslıqnı östen kürü elekke sovetlar berlege illäreneñ izolyatsiädän çığuı kebek ğämällärne başqarğan şäxeslärgä, bigräk tä Tatarstan prezidentı M.Şäymievkä, “İrekle Yevropa-Azatlıq” radiokorporatsiä citäkçese Tom Dine ğa millättäşlärebez härwaqıt räxmätle bulıp qalır.

Xäzerge şartlarda mäğlümat ölkäsendäge xezmättäşlekneñ yaña etabı turında ayırım söyläşergä kiräkter. VGTRK häm anıñ Tatarstan filialı citäkçelege belän bergä tıñlawçılarnıñ ixtiacın qänäğätländerü, yuğaltularnıñ zıyanın niçek tä kimetü çaraların kürü turında da söyläşmiçä bulmas. Härxäldä, elekke Tatarstan däwlät radiosınıñ yaña tapşırular çeltären tamaşaçılarğa citkerü hiçşiksez kiräk. Bu eştä “Azatlıq” radiosınıñ Qazan byurosı da qatnaşaçaq. Çönki künekkän tapşırularnı yuğaltu tıñlawçılarda uñaysızlıqlar tudıra. Küçeş çorında häm yaña şartlarda niçek yäşärgä kiräklegen milli cämäğätçelek bergäläp tä xäl itä ala.

Telägän keşelär “Azatlıq” radiosınnan ayırılmayaçaq. Çönki ul elekkeçä qısqa dulqınnarda ber säğätlek tapşırunı täwlegenä dürt tapqır efirğa çığara. Qısqa dulqınlı radioalgıçlarnı härqayda satıp alırğa mömkin, barı tik tapşırularnıñ efirğa çığu waqıtın häm yışlıqlarnı belergä kiräk. Şulay uq, internet aşa tıñlaw, yañalıqlarnıñ tekstın internettan uqu mömkinlege dä Ä Tatarstanda yäşäwçelär häm «NTV +» iärçene sisteması aşa “Yaña Ğasır” teleradiokanalın qabul itüçelär “Azatlıq”nı här könne kiçke säğät 9да häm irtänge 5да 91,5 FM dulqınnarında tıñlıy alalar.

Radio tapşırular çeltäre üzgärsä dä, açıqlıq häm mäğlümat taratu, demokratiägä qibla totu üzgärmäs dip ömetlänäse kilä. 1нче aprel'dän soñ “Azatlıq”nı barı tik qısqa häm FM dulqınnarında çığuçı “Yaña Ğasır” radiosı aşa tıñlaw mömkin bulaçaq. Yäğni ozın dulqın aşa tıñlarğa 27 kön qaldı. Qalğan waqıtta ”Azatlıq” radiosın tıñlaw ısulların tabarğa tırışığız. 50 yıldan artıq eşläwçe “Azatlıq” radiosınnan häm tatar-başqort mäğlümat möxitennän ayırılmaw üzebezdän tora.

Rimzil Wäli

XS
SM
MD
LG