Accessibility links

якшәмбе, 11 декабрь 2016, Казан вакыты 01:20

İlnur Miñnäxmätov häm Diana İbrahimova - Azatlıq radiosı bäygeseneñ ciñüçeläre


Här bäygeneñ iñ küñelle mizgele – ciñüçelärne büläkläw tantanasıdır, möğäyen. Menä, nihayät, bu mizgel Azatlıq radiosınıñ Ana tele köne uñayınnan uzdırılğan bäyge ciñüçeläre öçen dä kilep citte. Bügen bezdä qunaqta – bäygedä ikençe häm öçençe urınnarnı yawlağan Diana İbrahimova häm İlnur Miñnäxmätov buldılar. Bez alarnı ciñüläre belän qotlap, radiobıznıñ istälekle büläklären tapşırdıq. Xäzer alar belän yaqınraq tanışıp kitik äle.

Min İbrahimova Diana, Qazannan, Qazan däwlät universitetınıñ sotsiologiä häm jurnalistika fakul’tetında uqıym, Kazanskie vedomosti gäcitendä eşlim. Azatlıq radiosınıñ öydä här könne diärlek tıñlıybız. Minemçä, ana telendä berençe çiratta ğailädä aralaşırğa kiräk. Bez öydä tatarça ğına söyläşäbez, äni mine tatar äkiätlären uqıp üsterde. Uquın da min tatar gimnaziäsendä uqıdım. Şulay bulğaç, tatar telen äybät beläm inde. Ä bäygedä täqdim itelgän süzlärneñ tärcemälären qaysın süzleklärdän ezläp taptım, qaysın üzem dä belä idem

Min Miñnäxmätov İlnur, üzem Tübän Kama şähärennän. Xäzer Qazan däwlät universitetınıñ Tarix bülegendä, ikençe kursta uqıym. Bezneñ öydä Azatlıq radiosın küptännän tıñlıylar. Qazanğa kilgäç tä, tulay toraqta här könne säğät 9da Azatlıq radiosın tıñlıym. Tatar tele belän inde küptännän qızıqsınam, şuña kürä sezneñ bäygedä qatnaşırğa buldım

Tel, ädäbiät häm sänğät institutı belgeçläre häm Qazan byurosı xäbärçelärennän torğan jyuri bu bäygedä berniçä östämä büläkkä layıq keşene dä bilgeläde. Azatlıq radiosınıñ istälekle büläkläre belän Ukrainanıñ Dnepropetrovski şähärennän Fäsxievlar ğailäse, Qazannan 70 yäşlek Sania apa İl’yasova häm Tübän Kamadan Narim İxsanovqa da tapşırılaçaq. Alarğa bez büläklärebezne poçta aşa yaqın arada cibärerbez. Bäygegä näticälär yasağanda, şulay uq Aqtanıştan Zämfira Fatıxova, Mamadıştan Gölfirä Mönipova, Surguttan Rawil Ğilfanov, Qazannan Nailä Ğataullina, Semberdän Naciä Nurmöxämmätova, Buadan Älfiä Ğöbäydullinanıñ cawapların da iskä alıp kitäse kilä. Alar da bezneñ bäygegä bik icadi mönäsäbät kürsätep, bik qızıqlı, üzençälekle cawaplar cibärdelär.

Döres cawaplarğa kilgändä isä, bezneñçä alar menä niçek yañğırıy. Свежий - tazä, yaña, saf; залог - yolım; вертолет - boralaq, фальсификация - bozıp kürsätü; менеджер - idäräçe; запас - xästär, tuplam. Xäyer, tıñlawçılarıbız bulğan süzlär belän genä çiklänmiçä, qayber süzlärneñ yaña variantların da yazıp cibärgännär. Mäsälän, Semberdän Fatix äfände fal’sifikatsiäne mäkerle yalğan dip, ä Surguttan Rawil Ğilfanov xärämläşterü dip yörtergä täqdim itälär. Ukrainadan Fäsxievlar ğailäse Vertoletnı Borğalaq dip ataw döresräk, dip sanıy. Ä menä Çallıdağı isemen yazmağan ber tıñlawçıbız vertoletnı oçqanat dip atarğa, täqdim yasıy. Ğomumän, tıñlawçılarıbız, bäygedä bik teläp qatnaşıp aña şaqtıy icadi kilgännär. Şuña kürä, bez kiläçäktä dä tıñlawçılarıbıznıñ küñelenä xuş kilgän şuşındıy bäygelärne ütkärep torırbız. Ä älegä bez bäygedä qatnaşuçılarğa tağın ber tapqır zur räxmät äytep, ciñüçelärne qotlıybız.

Gölnaz İlgizär

XS
SM
MD
LG