Accessibility links

чәршәмбе, 7 декабрь 2016, Казан вакыты 23:31

Azärbaycan: bäysez xäbärçene üterü anıñ xakimiatne tänqitläwenä bäyleme?


Xäbärlärdän işetüegezçä, Azärbaycanda üz fatirı qarşında xakimiatkä oppozitsiädä torğan "Monitor" basmasınıñ möxärrire Elmar Xuseynov atıp üterelde. Ul elek tä üz basmasında çığarğan mäqälälär öçen xakimiat tarafınnan mäxkämälärgä tartıla ide. Xoquq saqlaw oyışmaları xäzer Xuseynovnı atıp üterüne anıñ şul jurnalistik eşçänlegenä bäyli.

Elmar Xuseynovnıñ xakimiat belän araları inde şaqtıy waqıt kierenke ide, xörmätle tıñlawçılar. Ul citäklägän "Monitor" basması Azärbaycannıñ xäzerge başlıqları, bigräk tä prezident İlham Aliev turında tänqiti mäqälälär bastırıp kilde, näticädä "Monitor" yä berniçä märtäbä yabılıp, yä mäxkämälär tarafınnan törle aqçalata ştraflarğa xökem itelep tordı. Uzğan dikäberdä genä Elmar Xuseynov xakimiatneñ säyäsi maqsatlardan çığıp üz basmasın ezärlekläwe turında bolay digän ide:

Audio, Elmar Xuseynov

"Min moña qarşı çığam, çönki bu qanunsız, hiçşiksez säyäsi kürsätmä bulıp tora. İke kön genä elek parlament citäkçese Mörtüz Aleskerov xökümättän "Monitor" mäcmuğasına nindi mönäsäbättä buluın sorap, aña qarşı çaralar kürüne taläp itkän ide. İke kön ütü belän mäxkämä bezne keremnärebezdän mäxrüm itärgä teli. Bu ğap-ğadi säyäsi ğämäl bulıp tora, alar "Monitor"nı bölgenlekkä töşerergä omtıla" digän ide märxüm Elmar Xuseynov dikäber ayında. İrekle mäğlümat çaralarına häm säyäsi oppozitsiägä qarşı qırıs çaralar Azärbaycanda 2003-nçe yıl üktäbre saylawlarında prezident itep İlham Aliev saylanğannan soñ kürelä başlağan ide. Tawış birü ütü belän anda oppozitsiädäge Musavat partiäse räiseneñ urınbasarı häm "Yeni Musavat" basması möxärrire Räüf Arifoğlu qulğa alındı, uzğan yılnıñ üktäbrendä ul xökümätkä qarşı uram cıyınnarı oyıştıruı öçen 5 yıllıq törmä cäzasına xökem itelde. New Yorkta urnaşqan "Jurnalistlarnı yaqlaw komitetı"nda Evropa häm Üzäk Aziä illäre öçen cawaplı Alex Lupis, Huseynovnı üterü Azärbaycandağı bäysez medianı qurqıtunıñ ber öleşe bulıp tora dip isäpli.

Audio, Alex Lupis

"Ni qızğanıç, soñğı yıllarda bez, xökümätneñ üzen tänqitlägän oppozitsiädäge häm bäysez mäğlümat çaralarındağı xäbärçelärne ezärlekläwen kürsätkän xällärgä şahid buldıq" di Alex Lupis, "Jurnalistlarnı yaqlaw komitetı" wäkile. İkençe ber xoquq yaqlaw wäkile, Venadağı Xalıqara matbuğat institutı xezmätkäre Diana Orlova, "Monitor"nıñ Azärbaycan xakimiaten inde küptännän eçen poşırıp kilüe xaqında äytä. Fivral ayında, misal öçen, basmanıñ xäbärçese Akper Xäsänov ber xärbi bülekçädäge xällär turında yazıp çıqqannan soñ, Azärbaycan xärbiläre tarafınnan totqarlanıp 5 säğät saq astında utırğan ide. Oppozitsiä xäzer Huseynovnı cirläwne xakimiatkä qarşı protest çarasına äyländerergä teli. Azärbaycan Xalıq Frontı citäkçese Ali Kärimle:

Audio, Ali Kärimle

"Elmar däwlät terrorınıñ qorbanı buldı, härkem monı belergä häm qurıqmıyça äytergä tieş. Bez xakimiatne yä cawaplılarnı xökemgä tartuğa, yä urınnarınnan kitügä mäcbür itärgä tieş" di Azärbaycan oppozitsiäse citäkçese. Ä xakimiat älegä Huseynovnı üterüne tikşeräçägen häm bu cinayätne qıluçılarnı tabaçağın wäğdä itä. Bu xaqta atnakiç prezident İlham Aliev üze belderde:

Audio, İlham Aliev

"Bu Azärbaycan tarixında berençe şundıy waqiğä bulıp tora, älegä qädär xäbärçelär tınıç şartlarda eşläp kilä ide. Bu ilebez öçen zur ğärlek, ä Azärbaycandağı demokratik täräqqiat öçen zur orım" dip bäyäli Bakuda bäysez möxärrirne atıp üterüne Azärbaycan prezidentı İlham Aliev häm:

Audio, İlham Aliev

"Min tärtip saqlaw oyışmalarına monı centekläp tikşerep cinayätçelärne xökemgä tartu kürsätmäsen birdem" dip belderä.

Kärim Kamal
XS
SM
MD
LG