Accessibility links

Кайнар хәбәр

Qazanda тatar yegete bäygese başlandı


Pänceşämbe könne Qazannıñ UNİKS konsertlar zalında Qazan däwlät universitetınıñ 200 yıllıq tarixında täwge tapqır iñ asıl tatar yegete saylaw bäygese buldı. Älege çaranı vuznıñ tärbiä häm sotsial' eşlär buyınça idärä yärdäme belän jurnalistika häm sotsiologiä, tatar filologiäse fakul'tetları ütkärde.
İke atna däwamında törle fakul'tetlarda saylap alu turları bulıp uzğan häm pänceşämbe tamaşaçılar qarşında 5 fakul'tettan 5 yeget köç sınaştı. Alar Röstäm Gayazov, Rail' Nuriev, Ruslan Yosıpov,Fänil Vakkazov, Aynur Sönğätov.Bäygeneñ jyuri äğzaları bulıp Älfät Zakircanov, Mörşidä Cihanşina, Fakilä Kamaletdinova, Oleg Xisamov, Çallı şähäreneñ “Mizgel” yäşlär üzägennän Venera Ğarifullina häm Zöläylä törkemeneñ solistkası Läysän Zakirova buldı.
Bäygeneñ berençe turında yegetlärneñ härqaysı üze belän bik üzençälekle tanıştırdı.
Ässälämeğäläykem, xörmätle watandaşlar, tuğannar, tumağannar, apalar, abıylar, enelär, señellär, uquçılar, uqımawçılar, barlıq zalda utıruçılar, utırmawçılar häm älbättä, güzällärneñ güzäle, batırlarnıñ batırı xörmätle jyuri äğzaları. Sezne KDUnıñ Yäşel Üzän filialınıñ talibı Aynur Sönğätov sälämli. Barı tik bügen genä, sezneñ öçen genä minem başqaruda iñ tekä cırlar, iyüllär. Min köne – töne söyläp tora alır idem, çönki talantım zur, läkin mömkinleklärem çikle.
İkençe turda yegetlärgä törle ölkädäge sorawlar birep, alarnı ziräklekkä häm tapqırlıqqa tikşerdelär.
Tübändäge yolalarnıñ qaysı qış fasılına qaramıy?
1.Narduğan
2.Şıylıq 3.Raştua.
Cawap: Şıylıq.
Sovet armiäse marşın kem yazğan?
Cawap: Salix Säydäşev.
“Başmağım” muzıkal' komediäneñ avtorı kem?
Cawap: Kärim Tinçurin.
Öçençe turda yegetlär, oyıştıruçılar belän aldan äzerlängän qapçıqtağı kiemnärne kiep, üzläreneñ moda yağınnan zäwıqların kürsättelär. Yegetlär kiengän arada “Urmay moñı” bötenräsäy cır festivale lawreatı El'wira Xisamieva çığış yasadı.
Dürtençe turda yegetlär tapqırlıq kürsätep, tormışta bula torğan qızıqlı situatsiälärdän çığu yulların ezlädelär.
Menä sineñ yaratıp jyuri torğan qızıñ bar di. Läkin könnärdän ber könne ul siña: “Min başqa yegetkä ğaşıyq buldım, läkin min sine dä yaratam”, dip äytä. Bu oçraqta sin nişlär ideñ.
Cawap: Başta min şayarıp, qaya tege yegeteñ belän tanıştır äle dip äytermen. Ä annarı üzemdä ğäyıpne tabıp, anı tözätergä tırışır idem.
Bişençe turda isä yegetlär üzläreneñ ostalıqların täqdim ittelär.
Soñğı turda alar populyar cırlarğa üzläreneñ xis- kiçereşlären kürsättelär. Şulay itep, bäyge näticäläre buyınça iñ asıl tatar yegete isemenä tatar filologiäse fakul'tetı yegete Fänil Vakkazov iä buldı. Şulay uq “Yaña ğasır” teleradiokompaniyäse millelekne üstergäne öçen Aynur Sönğätovqa maxsus büläk tapşırdı.
Oyıştıruçılar äytkänçä bu bäyge şähärebezneñ törle vuzlarında ütkäreläçäk häm may ayında şähärara Tatar yegete bäygese bulaçaq.
Gölnaz Şäyxetdinova, Qazan.
XS
SM
MD
LG