Accessibility links

сишәмбе, 6 декабрь 2016, Казан вакыты 08:47

www.tatar-inform.ru iñ mäşhür xatın-qızğa tawış birergä çaqıra


www.tatar-inform.ru säxifäsendä üzençälekle fiker beleşterü başlandı. 8nçe mart, xatın-qızlar bäyrämenä turı kiterep, agentlıq «Qaysı xatın-qıznıñ ireşelgän uñışları sezgä iñ zur tä’sir yasadı?» digän tawış birü başlap cibärde. Bäygedä Tatarstannıñ 15 xatın-qızı çığarılğan. Alar arasında, aktrisa İlsöyä Töhvatullina häm Yelena Nenaşeva, cırçı Zilä Söñğatullina, eşmäkärlär Möslimä Latıypova, Mariä Ğorşunova, Zäkiä Şafiqova, cämäğät eşlekleläre häm säyäsätçelär Zilä Wälieva, Fäwziä Bäyrämova, Rimma Ratnikova, İrina Laroçkina häm başqa güzäl zatlar da bar. Älegä berençe urında xökümät räise urınbasarı Zilä Wälieva bara. Anıñ öçen 42 tawış birelgän, annan soñ 26 tawış belän Fäwziä Bäyrämova bara, şaxmatçı Älisä Ğällämova öçen 24 keşe tawış birgän.

Älege soraştıru 9nçe martqa qädär baraçaq. Ä 7mart könne Zilä Wälieva «Tatar-inform» agentlığı säxifäsen qullanuçılar belän on-line söyläşügä çaqırılğan. Tatarstan xökümäte räise urınbasarına internet aşa teläsä nindi soraw cibärä alasız. Anıñ öçen «Tatar-inform» säxifäsenä kerep, qunaqqa soraw birü digän bülekkä uzarğa kiräk. Açılğan täräzädä isemegezne häm sorawığıznı yazıp cibärü mömkinlege bar. Adresnı qabatlıym www.tatar-inform.ru.

www.tatarlar.ru ütkärä torğan «Yıl tatarı 2005» digän soraştıru däwam itä. Anda tawış birüçelär sanı 500dän artıp kitte. Berençe urında bu atnada da, keçkenä miss Daniä Ğöbäydullina bara, ul 19% tawış cıyğan. Fändäs Safiullin – 17 % , Marat Safin 15%, Cämilä 14% tawışnı cälep itkän. www.tatarlar.ru/new/060205.html

Qayber mäğlümatlarğa qarağanda tatarlar.ru tatar telendäge bülegen yasarğa niätli. Ul latinça tatarça bulırğa tieş. Yaqın arada, proyekt xucaları, anı kiñ cämäğätçelekkä täqdim itärgä äzerlänä.



Bu atnada Çexiä tatarları Tatnetta iğtibar üzägendä buldı. İntertat.ru Pragada ütkärelä torğan Saban tuyı turında yazıp çıqtı. Bu bäyrämgä äle bik irtä bulsa, şul xäbärneñ ni säbäple dönyağa çığuı soñınnan añlaşıldı. «Radio Praha» däwlät radio kanalınıñ internet säxifäsendä Çexiä tatarları oyışması häm ütkärgän bäyrämnäre turında 2nçe mart könne zur mäqälä basılıp çıqtı. Şuşı radionıñ tapşırularında Çexiä tatarları oyışması wäkile häm bezneñ Praga redaksiäse xezmätkäre Kärim Kamal qatnaşıp, tatarlar, alarnıñ milli bäyrämnäre turında söylägän bulğan. Şuşı söyläşüneñ tekstı www.radio.cz säxifäsendä dä basılıp çıqtı. Çexiädä «tatar» dip bik uq aqıllı bulmağan keşelärne atıylar ikän. Läkin belemle keşelär, başqa törle tatarlar barlığı turında da belälär, dip söyläşüne başlıy radio xäbärçe. Kärim Kamal, älege äñgämädä, tatar oyışması, Çexiä häm Tatarstannı bäyläwçe ceplär, Saban tuylarnı niçek itep ütkärü xaqında söylägän. Älege mäqälä belän radio säxifäsendä tanışa alasız. www.radio.cz/ru/statja/63950. Ä Çexiä tatarların räsemnärdä kürergä teläsägez, alarnıñ internet säxifäsenä uzığız. Adresı www.tatar.cz. Sayt açılğaç, Çexiä tatarlarınıñ yäşel tösne häm latin grafikasın yaratuları açıqlana. Säxifädä, «millät», «däwlät», «tel», «tarix», «aşlar», «köylär» kebek büleklär bar. Sabantuy, başqa oçraşularnıñ räsemnären qarap çıqqan soñ, «qunaqnamä» digän bülektä Çexiä tatarlarına sälämnäregezne yazıp qıldıra alasız.

Bikä Timerova.

XS
SM
MD
LG