Accessibility links

шимбә, 3 декабрь 2016, Казан вакыты 20:44

Qıtay parlamentı Taiwannıñ bäysezlegen çiklägän qanun ölgesen tikşerä


Pekinda bügen açılğan Qıtay parlamentınıñ yıllıq sessiäse köntärtibendä – Taiwan mäs''äläse. Bäysezlek iğlan itkän bu utrawnı Qıtay üzeneñ ber töbäge dip sanıy. Parlament Taiwannıñ bäysezlegen tıyu turında qanun ölgese öçen tawış birergä tieş. Qıtay Taiwan belän tınıç şartlarda berläşügä çaqıra.

Parlament utırışı milli gimn häm soñınnan premyer-ministr Wen Jiabao''nıñ çığışı belän açıldı. Pekinnıñ zur zalında 3 meñgä yaqın delegat cıyılğan ide. Premyer Wennıñ çığışı küp qırlı bulsa da iñ küp qul çabu häm xuplaw anıñ Taiwannıñ bülenep çığuına qarşı qanun qabul itü täqdimenä buldı.

"Tikşerü häm xuplaw öçen sezgä tapşırılaçaq "bülenep çıqmaw" turındağı qanun ölgese bezneñ bu mäs''älädäge qaraşıbıznıñ üzgärmägänen kürsätä. Bez çın küñeldän kire berläşgä taba eşne däwam itäbez. Älege qanun böten Qıtay xalqınıñ ilneñ bötenlegen häm bäysezlegen saqlap qalu telägen çağıldıra. Bez ayıruçı köçlärneñ ber nindi yullar belän dä Taiwannı Qıtaydan ayıruların telämibez."

Delegatlar qul çaptı, ämma Taiwan älege mäs''älägä başqa törle qaraş belderä.

Taiwan räsmiläre, mondıy qanun qabul itelsä, Qıtay utrawnı köç belän alaçaq, dip borçıla. Taiwan 1949nçe yılda watandaşlar suğışı tämamlanğaç üzen Qıtaydan bäysez dip iğlan itkän ide. Ämma räsmi töstä bäysezlek iğlan itsälär Qıtay Taiwanğa qarşı çaraların qırıslatırğa cıyınuın belderde. Taiwan vise prezidentı Annette Lu, qanun ölgesen täñqitläp çıqtı. Pekinğa, "ike Qıtay" buluın qabul itergä waqıt, dide ul. Taiwannıñ bäysezlegen yaqlawçı köçlär yäkşämbe könne uram cıyınnarın oyıştıra.

Ämma Qıtay parlamentınıñ bıyılğı sessiäse tämamlanu waqıtına, 14 martqa qadär, älege qanun qabul iteler dip farazlana. Milli Xalıq Kongressı dip atalğan älege idarä ğadättä xakimiättäge kommunistlar täqdim itkän barlıq qanunnarnı xuplıy.

Alsu Qormaş
XS
SM
MD
LG