Accessibility links

пәнҗешәмбе, 8 декабрь 2016, Казан вакыты 21:14

Salawat qıstıbıy yarata: Tömängä icadi säfär tämamlandı


Här yıl sayın Salawatnıñ tatar xalqı küp yäşägän şähärlärne urap qaytuı ğädätkä kergän. Töbäklärdä yäşäwçe cır söyüçelär belän oçraşıp yaña cırların, artist tele belän äytsäk, yaña konsert proğrammasın kürsätep kitä. Yaz köne ul ğädättä Tömän ölkäsenä häm tönyäk şähärlärgä yul tota. Menä Salawatnıñ turnesı başlandı. Berençe konsertın ul 2 nçe martta Tömändä birde. Bu yulı törkemen Qazannan autobusqa utırtıp cibärep, üze poyızd belän kilde. Ä menä Salawat poyızdda waqıtta “Tatarstan yaña ğasır” tele qanalında anıñ berençe “Salawatta qunaqta” digän tapşıruı böten dönyağa kürsätelde. Salawat: Bu fäqät minnän çıqqan täqdim buldı. Çönki, tatar telewideniäse ul bezneñ küptän kötkän äyberebez. Xıyal. Bu xıyalnı tormışqa aşırdıq. Tatarstan xalqı, älbättä prezidentıbız, xökemätebez xıyalğa aşırdı. Läkin “Tatarstan Novıy Vek” digän kanalnıñ bäläkäy genä ber protsentı qalıp bara tatarlarğa. Bez söymägän, bez belmägän millätlär kerep üzläreneñ proyektların urnaştırıp yatalar. Min bu äybergä bik qarşı. Çönki, anda tatarnıqı bulırğa tieş ul. 24 säğät buyına, ni äytmeşli tatar cırları, tatarça spektäkl. Eşem bolay da tığız, bik küp. Soñğa qalabız axırı alıp qalıym äle berär kanalnı digän fiker inde ul minem. Berençesen eşlädek İlxam Şaqirov belän. İkençesen qararsız Şäwkät Biktimirov belän. Öçençesen Ğäliäskär Kamal teatrınıñ direktorı Şamil Zinnurovıç belän. Dürtençese bulaçaq Awropa çempionnarı autoğonşçiklar belän. Annan inde tamaşaçılar sorağan artistlarnı kübräk. Kübräk telewidenie häm radio aşa äzeräk cırlıy torğan şäheslärebez cırlayaçaq. Älfiä apa, İlham abıy, Flürä Söläymanowa, Ğabdulla Räximqulov, Taxir Yaqupov häm başqalar häm başqalar. Kön sayın telewideniädän töşmi torğan sanduğaçlarıbız ul qanalda çığış yasamayaçaqlar dip isäplim inde min. Çönki alarnı bolay da inde irtän torsañ kiçkä tikle radio häm telewidenie ya kemder sorap ala alarnı. Ya kemder tartıp meñgerä. Kemder etep meñgerä telewideniägä. Şuña kürä şäheslär belän genä şöğellänäçäkmen. -Alarnı keşe bularaq açırğa tırışasızmı? -Menä Älfiä apanıñ sin Älfiä Awzalowa ikänen beläseñ. Xätta qaysı yaqtan ikänen, nindi tormış ikänen belmiseñ. Monda inde kübräk üzläre turında üzläre söyläyäçäklär. -Açılmağan bitläre. -Äyye şäxeslärneñ açılmağan bitläre. Bu tapşıru tağın ber närsäse belän ayırılıp toraçaq. Bu tapşıruda min üzem ber tapqır da üzem cırlayaçaqmın. Bu miña dan şöxrät qazanır öçen eşlängän äyber tügel. Küñelem quşqannı eşlim. Salawat Fätxetdinov digän cırçı anda ber waqıtta da çığış yasamayaçaq. -Salawat teleproyektlar qıybat tora. -Yuq. Bez aqçadan qıybatıraq. Aqça... Böten äyberne dä aqçağa qorıp beterep bulmıy. İnde yäş tä bara Allağa şöker. Küñel telägän äyberlär bar. Annan inde minem duslarım bik bay. Min äytkäç tä: “Şundıy-şundıy proyekt, beraz aqçalar taläp iter inde. Yegetlär sezdän dä yärdäm kiräk”,- digäç, Salawat abıy nindi soraw. Bersüzsez. Xätta küpme dip tä sorap tormadılar. Şuña kürä duslarım Allağa şöker. Sänğätne yaratuçı tatar bayları bik küp. Anıñ qaysı bersen tabırğa kiräk, qaysı bersen uyatırğa kiräk. Min üzem dä naçar keşelär yanında yörmim. İ minem tirädä dä naçar keşelär yörmi. -Salawat! Sezne qıstıbıy yarata dilär. Menä bez radiotıñlawçılarğa şundıy soraw birgän idek. -Qıstıbıynı yaratam. Läysän peşergän qıstıbıynı ğına yaratam. Minem xatın sımaq başqaça qıstıbıy peşerüçe yuq. Başqa bütän äyberne peşerä dä belmi torğandır... -Menä bit 8 nçe mart citep kilä. Läysän Qazanda, ä sin çittä. -Yasap kittek büläkne. Minem çitkä çığıp kitü anıñ öçen üze ber bäyräm. 8 mart büläge şul bulaçaq. Monsı şayaru. Bez härwaqıt telefonda, härwaqıt svyäzdä. Äytkänemçä Salawat bu könnärdä Tömän ölkäseneñ Tönyäk şähärlärendä konsert quya. Xatın-qızlar bäyräme aldınnan änilärgä, qızlarğa, xanımnarğa cılı teläklären dä äytä. Tömän radiosın tıñlawçılarğa “Salawatnıñ iñ yaratqan rizığın belsägez, 8 mart aldınnan büläk yasap, konsertın buşqa qarıy alasız”,- dip soraw birgän ide. Bu sorawğa barı tik ber genä döres cawap alındı. Anı Tömän şähärendä yäşäwçe Rawza Polişçuq äytte. Rawza apa: “Min üzem qıstıbıy yaratqaç, nişläpter Salawat ta qıstıbıy yaratadır dip uyladım”,- dide. Nail Alan,Tömän

XS
SM
MD
LG