Accessibility links

җомга, 2 декабрь 2016, Казан вакыты 23:00

Yäşlär ictimağı palatasınıñ tä’sir itü köçe arta


Däwlät Şurası räise urınbasarı Rimma Ratnikova, 5nçe martta bulğan palata utırışında çığış yasağanda, şul yaqnı bilgeläp ütte. Şul xätle köçle ul xäzer, zurlar parlamentında da tä’sir itep, deputatalarnıñ eşen totqarlıy ala dip, däğwä dä belderde ul. Eş şunda. Däwlät Şurası utırışlarnıñ bersendä deputatlar «Yäşlär turındağı qanun»nı qabul itärgä telägän ide dä, ämma Yäşlär eşläre ministrlığı, äle yäşlär palatası üz fikeren äytmäde, dip alarnı tuqtattı. 90nçı yıllarda qabul itelgän «Yäşlär turındağı» qanunğa, zamanalar üzgärü säbäple, tözätmälär kertü kiräk buldı. Yäşlär palatası üzläre turındağı qanunğa tözätmälär äzerlärgä dip, inde berençe utırıştan, ütkän cäydän alındı. Yäşlär, buldırğan qädär tözätmälär dä äzerläde. Ämma nigäder alar haman da kertelmäde. Soñınnan, qanunnıñ xäzerge xaläte belän Yäşlär eşläre ministrlığınıñ qänäğät tügel ikäne açıqlandı. Rusiä däräcäsendä Yäşlär eçläre ministrlığı bulmağanğa kürä, bu ölkädän Mäskäwdän vertikal töşmi. Şuña Tatarstan ministrlığı täñgälläşterü barışında, beterelüdän qurqa. Şuña yäşlär turındağı qanunğa yäşlär ministrlığı üzen kertterep, üzeneñ xoquqi nigezen nığıtırğa teli. Yäşlär palatası bu tözätmäne yaqlap çıqtı. Annan arı qanunğa yäşlär oyımalarına 30 dan olıraq keşelär kerä ala, yäşlärgä taşlamalı kredtlar birü häm başqa şundıy matdälär dä xuplaw taptı.

Yäşlär ictimaği palatası ministrlıq äzerläp birgän patriotik ruxta tärbiäläw programması belän dä tanıştı. Ul programma, asılda, yäşlärne xärbi-patriotik ruxta tärbiäli bulıp çıqtı. Mäsälän anda, qar desantı, cirlänmägän soldatlarnı kümü eşe, Ciñüneñ 60 yıllığın zurlap bilgeläp ütü, «Zarnitsa» digän xärbi uyın ütkärü, suğışta qatnaşqannarnı xörmätläw, armiä saflarında xezmät itüneñ uñay yaqların kürsätü, su astı köymälärendä xezmät itüçelär belän mäktäp balaların oçraştıru häm başqa şundıy çaralar qaralğan. Milli çaralar programmada bik az külämdä qaralğan häm kübesençä, Tatarstan tatar belän bergä, başqa küp sanlı millätlärneñ tuğan yortı digän ruxta ütkärergä täqdim itelä. Programma belän tanışqaç, yäşlär, xärbi tärbiä belän genä çiklänmiçä, Watannı yaratu töşençäseneñ başqa yaqlarına iğtibar birergä täqdim itte. Patriotik tärbiä eşe belän maxsus respublika üzäge şöğellänergä tieş bulaçaq. Ministrlıq wäkilläre andıy üzäk bik kiräk dip ışandırğaç, palata äğzäläre, yaña oyışma buldıru täqdimen xuplap çıqtı. Yäşlär ictimaği palatasınıñ axırğı qararında, yäşlärne patriotik ruxta tärbiäläw däwlät programmasınıñ ütäleşe öçen byudjettan aqçanı bülep birüne sorarğa, rayonnarda cirle patriotik tärbiäläw programmaların buldırırğa, tärbiä birü üzäklären oyıştırunı tizlätergä digän täqdimnär kertelde. Şulay uq, palatanıñ qararında, yäşlär oyışmalarına Ciñüneñ 60 yıllığın bäyräm itüdä qatnaşırğa, digän çaqıru da kertelde. Cuyılışta tağın Rusiä däwlät Dumasınıñ yäşlär palatası başlığı Denis Gribov häm Federatiä Şurası qarşındağı yäşlär parlamentları assambleyası citäkçese Larisa Sinyäkova da qatnaştı. Alar yäşlärne aktivraq eşläp, tizräk säyäsi köçkä öylänergä çaqırdı.

Bikä Timerova.

XS
SM
MD
LG