Accessibility links

якшәмбе, 4 декабрь 2016, Казан вакыты 11:15

Başqortstan tatarları berläşergä çaqıra


Tatar ictimaği üzägeneñ ike tarmağı da üzäkneñ qorıltayına äzerlänä. Ara-tirä älege äzerlek eşläre turında mäğlümät Azatlıq radiosına da kilep citä, matbuğat çaralarında da dönya kürä. Şuşı könnärdä genä, mäsälän, menä şundıy eçtälekle ber belderü kilep ireşte. Anda Bötentatar ictimaği üzägeneñ üzeneñ 2 aprel’da Qazanda uzaçaq cıyınına äzerlege turında äytelä. Şuşı uñaydan 5 häm 6 mart könnärendä üzäkneñ Alabuğa häm Çallı büleklärendä cıyılışlar bulıp uzğan. Alabuğada älege cıyılışta bu bülekneñ isäp-saylaw konferensiäse dä ütkän. Anda bülekneñ yaña idäräse häm räise saylanğan. Xäzer Tatar ictimaği üzägeneñ Alabuğa bülekçäsen Damir Xäsänov citäkli. Çallıda häm Alabuğada uzğan cıyılışlarda Qazan wäkilläre dä qatnaşqan. Alar arasında Räşit Yağfarov häm respublikanıñ Mäxällä ictimaği oyışması citäkçese Näzif Xämitov ta bulğan. Qorıltaylarğa äzerlek turında internet çeltärendä dä mäğlümät tabıp bula. Tatar gäcitendä, mäsälän, Räfis Kaşapov isemennän Bötentatar ictimaği üzägeneñ VIII qorıltayına çaqıru urnaştırılğan. Ul Qazan milli-mädäni üzägendä ütäçäk ikän. Çaqıruda yaqın arada uzaçaq qorıltayda qaralaçaq mäs’älälär, tikşereläçäk sorawlar, oyıştıru komitetı wäkilläreneñ telefonnarı da birelgän.

Annan tış, Azatlıq radiosına tağın ber qızıqlı möräcäğät kilep ireşte. Bötentatar ictimaği üzäge isemenä yullanğan bu möräcäğät Başqortstan respublikası tatarlarınıñ ictimaği oyışmaları berlege isemennän yazılğan häm anı älege berlekneñ Prezidium räise Ramil Bignov imzalağan. Anda äytelgänçä, Başqortstannıñ ictimaği oyışmaları berlege da Bötentatar ictimaği üzägeneñ ike qorıltayına çaqıru alğan. Şuşı uñaydan kürşe respublikadağı millättäşlärebez dä üzläreneñ borçuların belderälär. Tatarstandağı millättäşlärebezneñ ike qorıltay oyıştırırğa teläwlären bez yöräk ärnüe belän qabul ittek. Bu tatar milli xäräkäten tarqatu, tatar ictimaği üzäge eşçänlegenä genä tügel, ä bar xalıqnıñ kiläçägenä zıyan kiteräçäk. Başqortstan tatarları üzläreneñ ürnägendä tarqalu yulınıñ yaxşığa kitermäyäçägen añladı. Barı tik berläşep kenä ber böten problemalarıbıznı xäl itä alaçaqbız, dip yazıla Ufadan kilgän belderüdä.

Bezneñ barıbızğa da Bötentatar ictimaği üzägeneñ tatar xalqınıñ ber öleşeneñ genä tügel, ä bar xalıqnıñ ictimaği oyışması ikänen onıtmasqa kiräk, dip yazalar üzläreneñ möräcäğätlärendä Başqortstan tatarları. Häm ictimaği üzäkneñ ike tarmağına da 12 mart häm 2 aprel’gä bilgelängän ike qorıltaynı da ütkärüdän baş tartıp, älege cıyınnı uzdırunıñ ber, urtaq könen bilgelärgä dä täqdim itälär. Anda böten Rusiädän cıyılğan Bötentatar ictimaği üzägeneñ bülekçäläre wäkilläre qatnaşırğa tieş, dip sanıy alar. Barı tik şuşı oçraqta ğına qorıltay legitim dip sanala ala, digän fiker belderälär üzläreneñ möräcäğätlärendä Başqortstan respublikası tatarlarınıñ ictimaği oyışmaları berlege wäkilläre. Älegä Başqortstandağı millättäşlärebez urtaq qorıltayğa çaqıru kötep qalalar. Alar üz maqsatlarına ireşä alırmı, yuqmı ikänen ozaq kötäse qalmadı.

Gölnaz İlgizär

XS
SM
MD
LG