Accessibility links

шимбә, 3 декабрь 2016, Казан вакыты 18:48

Moxtariät probleması häm saylawlar…


Omskinıñ “Umırzaya” tatar-başqort xalıq ansamble üzeneñ çirattağı konsert - kiçäsen Rusiädä kiñ külämdä bilgelänä torğan xatın – qızlar könenä bağışladı. Konsert programması asılda güzäl zatlar öçen icat itelgän cırlardan tözelgän ide. Şunsı da kürkäm buldı, başqarılğan härber diärlek cır, zalda utırğan ölkän apalarğa isemläp ayırım bağışlandı. Waqıtına kürä konsertnıñ tağı ber üzençälege buldı - alda şähär başlığı saylawları torğanlıqtan, berniqädär säyäsi tösmer dä aldı. Seber yağı möselmannarı möftie Zölqarnäy xäzrät Şakircanov doğa belän kiçäne açıp, ansambl'neñ xatın-qızlarına çäçäk bäylämnäre tapşırğannan soñ, tamaşaçılarğa şähär başlığı wazifasına däğwa itüçe gubernator urınbasarı Viktor Şreyder öçen tawış birergä öndäp möräcäğät itte. Bu nämzätneñ möselmannarğa yärdämle buluı, cämiğ mäçeteneñ tämamlanıp betmägän tözeleş eşlären üz östenä aluı, bu xacätkä inde aqça da bülep birüe turında bäyän itte.

Konsert-kiçä barışında tağın ber säyäsi moment bulıp aldı. Ölkä milli-mädäni moxtariäteneñ räis urınbasarı Xälil Sadıykov zalda utırğan xalıqqa moxtariät urnaşqan bina öçen arenda bäyäseñ küpkä artuı, bolay da zur çitenleklär belän xäl itelep torılğan tüläw problemasınıñ xäzer xäl itelmäslek däräcädä kilep citüe, kiläçäktä binadan baş tartırğa turı kiläçäge xaqında citkerde. Bu mäs`äläne xäl itüdä yärdäm soradı, kiñräk cämäğätçelekkä belderü, anı xäl itüne xakimiät aldına quyu maqsatınnan tiz arada konferensiä oyıştırılaçağın belderde häm anda aktiv qatnaşırğa çaqırdı.

Konsert tämamlanğannan soñ şähär xakimiätenä bina öçen barlıq tüläwlärne byudjet isäbenä kertüne sorap yazılğan xatqa imza cıyu oyıştırıldı. Xatnı imzalağan ber millättäşebezdän min bu ğämällär näticäse bulırmı dip soradım.

Şulay itep moxtariät citäkçelege binanı uz qaramağında qaldıru xästären kürä. Anıñ näticäläre nindi bulır, aldağı xäbärlärebezdä beldererbez.

XS
SM
MD
LG