Accessibility links

якшәмбе, 11 декабрь 2016, Казан вакыты 05:26

Sarajevoda suğış cinäyätläre mäxkämäse açıldı


Biredä bügen Balkandağı berençe suğış cinäyätläre mäxkämäse açıldı. Çarada 100dän artıq yuğarı däräcädäge räsmilär, Yugoslaviä öçen Xalıqara Cinäyätlär Tribunalı prezidentı Theodor Meron, baş prokuror Carla del Ponte qatnaştı. Carla del Ponte – maqsatnı bolay dip bilgeläde: "Eşneñ näticäse şul – qorbannar mömkin qadär qanäğät bulırğa tieş. Alarnıñ sanı yözlägän meñ. Häm alarğa berençe çiratta yardäm kiräk," dide baş prokuror. Bosniädäge xalıqara küzätüçe Paddy Ashdown, ğadellek tabu mömkinlekläre tudıru - Bosniäneñ bäysezlegenä taba zur adım, dip belderde. Bosniä suğış cinäyätläre mäxkämäse tiz arada Berläşkän Millätlär Oyışmasınıñ suğış cinäyätläre mäxkämäse eşen ciñeläyter, dip kötelä. Ul arada elekke serbiä xärbi köçläre generalı Momçilo Perisiç, Hague mäxkämäseneñ anı 90nçı yıllarda Xorvatiä häm Bosniädä keşe üterü, cäberläw häm höcümnär oyıştıruda ğayepläwlären kire qaqtı. Aña keşeçelekkä qarşı höcümnärdä 8 maddädä häm suğış qanunnarı bozuda 5 maddädä ğayepläw belderelgän ide. Alar arasında Sarajevonı 43 ay qamawda totu, ul waqıt eçendä meñlägän tınıç keşeneñ üterelüe häm yaralanuı, 1995nçe yılnıñ may ayında Xorvatiä başqalası Zagrebnı utqa totu, şul uq yılnı Srebrenisada 7 meñnän artıq möselman ir keşe häm malaylarnıñ üterelüe turındağıları da bar. Perisiç Yugoslaviä xärbi köçlären 1993tän 1998nçe yılğa qadär citäkläde.

XS
SM
MD
LG