Accessibility links

шимбә, 3 декабрь 2016, Казан вакыты 09:58

Tarqalu qorıltayı yaqınlaşmıymı?


10 martta Qazannıñ Jurnalistlar yortında Milli Şura wäkilläre matbuğat oçraşuı ütkärde. Alar anda Şuranıñ oyıştırıluı häm anıñ maqsatları, kiläçäk eşçänlege turında söylädelär. Milli Şura iseme astında berläşkän oyışmalar Tatar ictimaği üzägeneñ eçke qarşılığı turında süz quyırtmadılar. Alar kübräk üzläreneñ oyışmaları aldında torğan problemalar xaqında fikerläştelär. Oçraşuda şulay uq 77 yıl däwamında eşläp kilgän Tatarstan teleradiokompaniäseneñ beterelüenä rizasızlıq beldergän möräcäğät taratıldı. BU möräcäğätne Milli Şurağa kergän 8 oyışma imzalağan. Anda Tatarstan citäkçelären Mäskäw unitaristlarına buysınmasqa, aqılğa utırıp, tatar radiosın yañadan ayaqqa bastıru öçen cämäğätçelekneñ böten köçlärne tuplarğa çaqıralar.

Şul uq könne Tatar ictimaği üzäge binasında üzäkneñ tağı ber tarmağı da jurnalistlar belän oçraştı. Köndezge säğät ikedä uzğan älege matbuğat oçraşuında Zäki Zäynullin, Yunıs Kamaletdinov häm Rinat Yosıpov qatnaştı. Mäğlümät çaraları wäkilläre dä qatnaşuçılar sanınnan ällä ni küp tügel ide. Press-konferentsiäneñ teması İctimaği üzäkneñ tizdän ütäçäk VIII qorıltayı, anı oyıştıru çaraları dip bilgelängän bulsa da, Zäki Zäynullin häm Yunıs Kamaletdinov üzläre citäklägän monetizatsiägä qarşı aksiälär turında da bik täfsilläp söylädelär. Üzläreneñ uramğa çıqqan törle millät xalqı belän urtaq tel tabuları xaqında äyttelär. Süz Bötentatar ictimaği üzägendäge tarqaluğa citkäç, Zäki äfände dä, Yunıs Kamaletdinov ta, ictimaği üzäktä bernindi dä raskol yuq, barı tik anıñ citäkçese probleması ğına bar, dip belderdelär. Qorıltayğa kilgändä isä, aña kiläse keşelär inde saylanğan, alarnıñ yaqınça sanı da bilgele ikän. Qorıltaynı oyıştıru komitetı citäkçese Yunıs Kamaletdinov cıyılışqa 150-200 keşe kilergä tieşlegen belderde.

Şulay itep, milli xäräkät wäkilläre ber ük könne cıyılıp, millätneñ bügenge xäle häm milli xäräkätneñ qiblası, xäl itelmägän problemaları turında söyläştelär. Häm qorıltayların üzläre telägän waqıtta ütkärergä cıyınuların belderdelär. Soñğı könnärdä Semberdän häm Başqortstannan milli xäräkätne ikegä bülep, qorıltay ütkärergä cıyınularına rizasızlıq belderüçelärneñ möräcäğätläre açıq qaldı. Taraflarnıñ ber-bersen işetmäwe 10 martta tağı da açığraq kürende.

Gölnaz İlgizär

XS
SM
MD
LG